Rakhine ram nikhat chungah hmun 3 ah kahdohnak a chuak, SAC ralkap 12 an thi
The Chinland Post | 2022 September 30 – Rakhine ram, Ponnagyun peng, Mrauk-U peng le Rathaedaung peng hna ah SAC ralkap le AA karlak i September 29 (nikhat) lawng ah a chuakmi kahdohnak ah SAC ralkap 12 nak tlawm lo an thi tiah AA lei nih an chim.
Yangon-Sittwe lam, Ponnagyun peng le Kyaukdaw peng ramri, Baukdaw khua SAC sakhaan ah eidin a chanmi SAC ralkap cu AA nih an kah hna i SAC ralkap 2 an thi, 5 an i hliam tiah AA lei nih an chim.
Baukdaw pawng Nanun tlang cungah hmunhma a khuarmi SAC ralkap pawl eidin chan ding in a raami Hijet a rangmi pakhat kan tlaih i mawṭaw mawngtu pa kan check lio a si tiah AA biachimnak nawl a ngeitu Khine Thukha nih Western News ah a chim.
Cu Kahdohnak ah eidin le ngacar cheukhat an lak khawh tiah a chim.
Mrauk-U peng Natan khua le Maungsuai khua karlak chun sml 3:00pm hrawng ah SAC ralkap pawl AA nih bom an puah hnawh hna i SAC ralkap 8 nak tlawm lo an thi i sml 2 leng kahdohnak chungah SAC ralkap 2 an thih caah SAC ralkap pawl an kir ṭhan tiah U Khine Thukha nih a chim.
Kahdohnak a chuah hnu ah Mrauk-U hrambunh LIB 378 nih hriamngan a kah i Maungsuai khua hngakchia 2 an i hliam i inn pakhat a rawk tiah theih a si.
Cun September 29 chun sml 2:00pm hrawng ah Rathaedaung peng Setipin-Kyaukpantu lam cungah eidin a phormi SAC ralkap pawl cu AA nih an kah hna i sml cheu hrawng kahdohnak a chuak.
Cu kahdohnak i SAC ralkap a thimi zat a fiang in theih a si rih lo tiah U Khine Thukha nih Western News ah a chim.
About The Author
