Rakhine Ramkulh Mraut U Um Muslim Cheukhat Bangladesh Ah An Zam

Aung Aung| 2018 January 19| Cawn Nili Thawk khan Kawlram in Bangladesh lei ah Rohingya Muslim pawl 100 leng an zaam than caah tu thla chung ah Bangladesh um Kawlram ralzaam pawl kir ter nak a tlamtling kho taktak lai maw timi lung retheihnak a chuak hoi.

Tu thla 23 thawk in kum hnih chung ah Bangladesh um Kawlram mi ralzaam paoh kir ter dih ding tiin ram hnih hnatlak nak an tuah.

Asinain cawn nili ni ah khan minung 113 tluk Kawlram in Bangladesh an phan than tiah Bangladesh ngiatlaitu le Cox’s Bazar um Kutupalong ralzaam buk ah bawmhchannak rian a quanmi phu pawl nih Reuter thawnglatu sinah an chim.

Cu leng ah zaam ding in tilawng a bawhmi an um len rih. Tilawng man pek awk an ngeih lo caah cuka ah cun an i hreng ko. Riantuan kan kal ahcun ralkap nih an kan tlaih lai ti an phan caah tubantuk in an zam hi a si. Hi a zaam hnik pawl hi Buti Taung Sing Yin Pin khua mi an si.

Hi ka hrawng ah hin ralkap nih hmumhma thianh timi tukdohnak cu a um lo nain Rakhine ramkulh Nitlak lei runvennak caah ralkap cu kan chiah ko hna tiah Pyitheyee ministry zung tuanvo ngei pakhat nih a chim.

Bangladesh ramdang pehtlaihnak zung tuanvo ngei pakhat nih a ra lai mi cawn nihnih ni cun ralzaam pawl kir nak thawk ding a si cang. Asinain Kawlram mi cungah zumh ngam nak an ngeih i anmah nih kir duhnak lungthin an ngeih lawng ah kir ter ding an si tik ah hi rian hi a tlamtling ding in ka hmu tuk lo tiah a chim.
Ref: VOA