Ralkap LIB 125 In Ralkap 93, Pyithusit 27, Palek 11 Telh In Ralkap Chungtel 272 Nih A Sung An Pek
The Chinland Post | 2023 November 30 — Shan ram chaklei, Laukkai hmunhma MOC kuttang LIB 125 Battalion in ralkap 93, Pyithusit 27, palek 11 telh in ralkap kuttang hriamtlai 272 nih thandar a rang thlai in a sung an pek tiah MNDAA lei nih Khit Thit ah an chim.
MNDAA nih pehzulh in kahdohnak a tuah i November 28 ah Konekyan sakhaan telh in ralkap battalion 1 cu a ning in an lak khawh, ralkap cheukhat le an chungkhar, Kaw miphun pyithusit telh in an zapi 270 leng nih a sung an pek, November 28 tiang ah MNDAA nih Konekyan hmunhma ah a um mi ralkap Company 5 le a pawngkam sakhaan cheukhat zong an lak khawh dih.
MNADAA nih kahdohnak ṭhawng taktak in a tuah caah Northeastern um ralkap LIB 125 Battalion chungtel an zapi nih thandar a rang thlai in a sung an pek hi a si.
Thil sining cu an Battalion Commander nih adang ralkap pakhat he MNDAA sin ah rak i fonh ding in nawl a hal hna i hliam a tuar mi ralkap pawl thlop piak ding le an chungkhar pawl umnak tawlrel piak ding in bawmhnak a rak hal hna i MNDAA lei nih an lungtlin pi caah atu bantuk in LIB 125 chungtel an zapi an rak i fonhnak hi a si i ralkap MOC commander nih adang ralkap 100 leng cu November 27 ah a zaampi hna tiah Khit Thit nih a langhter.
Hriam chiah in a sungpe mi hna hi – Kaw miphun pyithusit 27, LIB 125 in ralkap 93, MOC 16 in ralkap 26, MOC 12 in ralkap 14, ralkap chungkhar 86, kahdohnak lei ruahnak petu 5 le palek 11 hna tiah an zapi 272 an si tiah theih a si.
About The Author
