Ralkap Nih Uknak An Laak Than Lai Timi Bia Hi A Dik Lomi A Si; U Zaw Htay
TCP-Online| 2018 June 6| June 23 ni Bangkok Post ah Larry Jagan nih Feature News a tialmi “NLD cozah nih May 31 ni ah rak thanhmi cu Rakhine ram a buaimi kongah cithlattu bu Committee kan ser lai i cu cithlattu bu ahcun ramdanglei in minung pakhat kan telh lai ti a si.
Cu kong cu June 8 ni khan ramkomh President zungah tonnak an rak tuah i ralkap bawizik Min Aung Hlaing nih cun–mah cithlattu bu ah hin ramdangmi nan telh dingah ka lung tling lo. A herh ahcun 2008 phunghrampi ningin Kawlram pi hi uknak kan lak than lai” tiah a chimmi cu Larry Jagan nih The Bangkok Post ah a tial.
Larry Jagan nih mahti a tial tikah vawleicung ramkhel minung tampi an khuaruah a har dih. Cutikah ramchung Media nih President zung chimnnaknawl ngeitu U Zaw Htay cu tonnak an tuah.
U Zaw Htay nih, “June 8 lio i President zung meeting tuah lio ah ahohmanh a thin hungmi le a awn hrangmi an um lo. Mah meeting ahhin kei zong kai tel ve ko. Larry Jagan nih Bangkok Post in a tial bang ralkap bawizik Min Aung Hlaing nih uknak kan laak than lai timi hi a dik lomi bia a si” tiah a chim.
NLD cozah nih ser timhmi Rakhine ram buainak kong i cithlattu bu committe ah ramdang minung pakhat telh timhmi kong ah hin teh ralkap nih zeitin an ruah ve ti an hal tikah U Zaw Htay nih hi kongah zeihmanh bia lehnak a tuah hna lo. June 6 lio Hluttaw tonpumhnak ah USDP Party nih cun cithlattubu Committee ah hin ramchung minung lawng tel hna hna seh ti an duhnak an rak langhter.
Germany hrambunh Kawlram ramkhel kong expert pakhat U Sain Won Sai nih cun, “Lorry Jagan nih Bangkok Post a tialmi ca zapi a hninhmi hi an mawh lo. Nain, kei ka ruah ningah cun ralkap nih cun uknak laak dih a hau ti tung lo. A duhmi an ngah cang ko cu ta! Uknak hna laak dih an timh sual ahcun ramkhel mit in zoh cun anmah tu an sung deuh ko lai cu ta. Uknak la loin an ummi kha anmah caah cun a tha bik ko” tiah a chim.
“President Thein Sein chan lio i Rakhine ram a buai tuk lio khan lakhruak in Rakhine ramkulh lawng ralkap nih uknak an rak laak. Mah an laakmi cu 2008 phunghram ning tein an rak laakmi a si. Larry Jagan nih a tialmi cu mahtluk nih mizapi a hip khawhmi hi a ngaingai ahcun cozah nih thawngpang thanh an rak daithlan ruangah a si. Tonnak an dihka khan mah thawngpang hi mizapi sin rak thanh hna sehlaw tubantuk in zapi zong a buaiter hna hnga lo” tiah ramleng hrambunh Burma Media Association President U Maung Maung nih a chim.
The Bangkok Post ah Feature News phantu Larry Jagan nih a tial ning ahcun Rakhine ramkulh buainak kong i NLD cozah nih cithlattu bu committee ser an timhmi ah ralkap lei nih ramdang minung telh an duh lonak kong, Senior General Min Aung Hlaing he pehtlainak a ngeimi ralkap bawi tuan balmi pakhat bia laak in a tial.
Ref; VOA
About The Author
