Ralkap Thazang A Der Tuk Cang Caah Ralkap Thar Khawmh Ding In Ralkap Phu Lutlai Pawl Nih An Fial Hna
The Chinland Post | 2023 December 4 — Myanmar ramchung ah a um mi ralkap battalion kip ah ralkap thazang a der tuk cang mi rulhnak ah a tlawm bik thla 1 ah ralkap 1 in kumkhat ah ralkap 12 nan khawmh hrimhrim hna lai tiah ralkap lutlai pawl nih a thli tein ca an i kuatnak cu Khit Thit nih a langhter.
October thla ah fialnak ca an thanh mi hi a si i cubantuk in ralkap an khawmh khawh hna nakhnga mipi pawl paw-ta an suai hna lawng siloin khuate ah khuabawi pawl kha ralkap ṭuan ding in minung an khawmh ter hna tiah theih a si.
Cubantuk in ralkap lutlai lei nih canthanh an chuah ning ah, ralkap battalion kip nih ralkap thazang an chap khawh nakhnga 2023 September thla thawk in thla 1 ah minung 1 in thla 12 ah minung 12 ralkap khawmh ding tiah an fial hna. Cubantuk in a tuah lo mi Battalion Commander pawl cu dantat nan si lai tiah ralkap phu lutlai pawl nih ralrinnak fak taktak an chuah.
2023 September in October 26 tiang ralkap thar an khawmh khawh lo caah atu bantuk in a voihnihnak ralrin an pek ṭhan hna hi a si tiah theih a si.
Ralkap phu lutlai pawl nih atu bantuk in nawl an chuah caah paw-ta suai, zaan ah mino tlaih i hramhram in ralkap luhternak hna a tam khun hi a si tiah Khit Thit nih a langhter.
About The Author
