Thantlang Um Dothlennak Phu Pawl Cu Sattellite (ဂြိုလ်တု) Hmang In Internet An Hmang Kho
The Chinland Post | 2023 December 4 — Chin ramkulh, Thantlang peng ah a um mi mipi uknak phu le hriamtlai phu cheukhat hna cu Sattellite (ဂြိုလ်တု) hmang in internet an hmang kho cang tiah theih a si.
Peng mipi uknak phu kuttang rianṭuantu pawl fimthiamnak hmang in Team ZNET (ZNET) phu nih Internet ngahnak lam pakhat an ser hnu ah atu bantuk in internet an hman khawh hi kum 1 le thla 4 a si cang tiah ZNET phu ṭuanvo ngeitu nih Delta News Agency ah a chim.
“Pehtlaihnak Operator pawl cu ralkap phu nih an tlaih caah dothlennak phu pawl nih kan ti khawh nak lam in Sattellite (ဂြိုလ်တု) hmang in internet kan van ngahter khawh” tiah a chim.
Atu bantuk in internet hman khawh a si mi hi dothlennak phu pawl pakhat le pakhat pehtlaihnak le dothlennak rian ca zong ah tampi a bawmh tiah a chim fawn.
Thantlang khua cu hramhram in uknak lak a si hnu ah phone line le internet line hna a rawh leng ah kahdohnak ruang ah khua ning pi in khanghpiak a si.
Phone line a rawh hnu in khuami, mipi uknak phu le dothlennak phu pawl hna cu India line kha har ngai in an hmang hna.
Mipi uknak phu le dothlennak phu pawl lawng internal line an hmang kho rih i khuami hna nih an hmang kho rih lo tiah theih a si.
“Mipi pawl zong hman khawh ning in kan timhtuah ko. Atu hi cu mipi hman ding ah a van har deuh rih” tiah ṭuanvo ngeitu nih cun Delta News Agency ah a chim fawn.
Atu bantuk in internet line hman khawh hnu kum 1 le thla 4 chung ah Myanmar tangka sing 1,400 leng a dih cang tiah a chim fawn.
Cun a ra lai mi 2024 chung ah Thantlang peng chung i 5% hmunhma ah internet line hmang kho ding in timhtuahnak an ngeih caah tangka sing 1,500 leng a herh tiah a chim.
“Thilri cah a har. A man an fah fawn caah tangka kan chanbau tuk. Cun mei zong kan har tuk” tiah ZNET phu ṭuanvo ngeitu nih a chim.
Cun ZNET phu ṭuanvo ngeitu hna cu NUG kuttang MOCIT he zong pehtlaihnak an ngei tiah theih a si.
Cu NUG kuttang MOCIT nih peng 5 ah internet line hmang kho ding in Federal Net Campaign an tuah cuahmah lio a si.
Cubantuk in ralkap nih phone line a thahnak Karenni ram cheukhat hmunhma zong ah Starlink Sattellite in internet an hmang kho tiah theih a si.
Ralkap phu nih cun Myanmar ramchung ah nawl lo in Sattelites le internet a hmang mi cu a zizut an si lai tiah a thanh ve.
About The Author
