Ralzaam 1 million a lonh cang tiah UNOCHA nih a thanh

The Chinland Post | 2022 June 1 – Myanmar ram ah inn le lo kaltak in a zaammi 1 million an lonh cang tiah United Nation’s  Officer for the Coordination of Humanitarian Affairs (UNOCHA) nih May 31 ah a thanh. Cun, a pawngkam ram ah a zaammi 40,200 hrawng an um i biakinn, phungki sianginn, sianginn le mipi umnak inn 12,700 leng hrawhpiak a si cang.

Myanmar ram hmunkip ah kahdohnak a fah bantuk in kahdohnak ruangah a taangmi bom ruangah mipi pawl harnak an tuar khun tiah aa ṭial.

Cucaah, hliamhma a tuarmi hna kilvennak le limhang ngei tein caan an hman ṭhan khawhnak hnga a rannak in bawmhnak an herh tiah UNOCHA nih ralrin a pek hna.

2022 March thla tiangah bawmhnak pek ding tiah ruahdamh a simi chung in 41% cu mipi 2.6 million sinah bawmhnak pek an si cang tiah UNOCHA nih a langhter. Asinain, eidin, datsi, ruah khamnak le a rannak in a herhmi thilrii pawl le thilman a kaimi hi bawmhnak a petu hna caah thinphang a si tiah a chim.

April thla thok in Rakhine, Kanchin, thlanglei Shan le Karen hna ah ruah a teh tuk ruangah ralzaam camp hna i an ruahkhamnak a rawk i harnak an tong chin tiah a chim.

Rakhine ram ah a ummi ralzaam camp ah a rannak in sak ṭhan colh a haumi inn 550 chung in 270 caah funding bawmh a si ko nain a tangmi inn remh ṭhannak ding caah USD $ 2.4 million a thlau rih tiah a chim.

2022 kum caah bawmhnak chung in thla 5 tiangah bawmhnak 10% lawng ngah a si i a tulio herhbaumi he tahchunh a si ahcun $ 740 million hrawng aa thlau rih tiah a chim.

Tukum caah bawmhnak a tu bantuk in aa thlau rih a si i funding aa ṭha tein hmuh a si lo ahcun fur chung ca bawmhnak hi ṭhumh chung a hau men lai tiah UNOCHA cathanhnak ah ralrinnak aa tel.

Na ruahning rak langhter ve.. (Leave a comment)

%d bloggers like this: