Ramkomh Hluttaw Nih Myanmar Ram President Ah U Win Myint An Fehter Cang
MYANMAR PARLIAMENT
City Hunter| 2018 March 28| March 28 ah tuahmi ramkomh hluttaw tonpumhnak ah Pyithu hluttaw Speaker hlun U Win Myint cu Myanmar rampi President ah an thim i an fehter taktak cang. President a tlingmi U Win Myint nih mee 636 chung ah mee a hmuh. Avoi 10nak Myanmar rampi hruaitu ding President thimnak le avoi 10nak President ah thimmi U Win Myint konglam le ramkhel lei a cawlcanghnak tuanbia tawi cu a tanglei bantuk in a si.
March 28 President Thimnak Le Mee Hmuh Zat
Ramkomh hluttaw ah MP zapi hi 656 a si. Hi chung ah NLD – MP hi 387, party dangdang in mizapi nih thimmi MP zapi hi 60 an si. Mizapi nih thimmi USDP- MP hi 44 an si. Mizapi nih thim lomi 25% in thlahmi ralkap MP hi 166 an si. March 28 ah tuahmi ramkomh hluttaw ah MP pawl khunh a lami (leave) minung 20 an um. Cu ruang ah mee a thlatu taktak hi 636 lawng an si. U Win Myint nih mee 403 a hmuh. Pu Henry Van Thio nih mee 18 a hmuh i U Myint Swe nih mee 211 a hmuh. Hnonmi mee zapi hi 4 a si. Cucaah, U Win Myint cu President, U Myint Swe cu Vice President-1 le Pu Henry Van Thio cu President-2 ah ramkomh hluttaw nih an fehter riangmang cang.
2016 Kum President Thimnak le Mee Hmuhzat
2016 kum Myanmar ram president thimnak ah mee an hmuhzat cu; U Htin Kyaw nih mee 360, U Myint Swe nih mee 213, Pu Henry Van Thio nih mee 79 an rak hmu. Pu Henry Van Thio mee petu zoh than tikah tlangmi party in MP 51 le NLD party in MP 28 te lawng nih an rak pek.
March 28, Myanmar rampi President thimnak ah Daw Aung San Suu Kyi, Pu Henry Van Thio le Thura Shwe Mann zong ngaithlaitu dirhmun in an i tel ve. Ramkomh hluttaw ah mee
March 21 ah President U Htin Kyaw nih phungningte in rian a chuahtaknak kong thawng a thanh. Cu bantuk in March 21 ni thengmang te ah Pyithu hluttaw Speaker U Win Myint nih a rian a chuahtak ve. Cu ruang ah President U Htin Kyaw zaka ah atu bantuk in thimnak an tuah hi a si.
Pyithu hluttaw nih Vice President thimnak an tuah colh ve i U Win Myint (NLD) le U Taung Aye (USDP) aa cuh ding in an chuahpi hna. Hluttaw nih mee thlaknak in an thim hna i Mee 304 chung ah U Taung Aye cu U Win Myint nih mee 273 in a tei. U Taung Aye cu mee 27 lawng a hmu.
Pyithu hluttaw nih Vice President caah an thimmi U Win Myint cu President si khawhnak tahfung a tlinh le tlinlo chekfelteu committee nih an chekfel hnu ah a tling tiah ramkomh hluttaw nih an fehter. Cu dih hnu ah Vice President a tuan liomi Henry Van Thio le U Myint Swe he an i cuh i atu bantuk in Myanmar rampi President ah mizapi nih an zumh bantuk te in a tling.
President U Win Myint Konglam A Dot Dot
U Win Myint (kum 66) cu 1951 November 8 ah a chuak. A chuahkehnak cu Irrawaddy ramthen, Danuh-phyu peng Ngaungchaung khua ah a si. Atu cu Yangon ramthen, Tamwe peng ah khua a sa cang.
Yangon Arts and Science University ah Geology in B.Sc, H.G.P le RL in degree a lami a si. 1985 in central baiceih zung (high court) ah sihne rian a rak tuan. 1990 kum thimnak tuah lio ah Pyithu hluttaw thimfung hmunhma in MP a rak tling. Cun, 2012 caankarlak thimnak zong ah MP a tling. 2015 thimnak tuah lio Yangon ramthen, Tamwe peng, Pyithu hluttaw thimfung hmunhma in MP tlingmi a si. Amah hi a hramthawk te in NLD party ah a lutmi a si.
2016 February 1 in 2018 March 20 tiang Pyithu hluttaw ah Speaker (Chairman) rian a tuan. 2018 March 21 ah Pyithu hluttaw Speaker rian in aa phuak i March 23 ah Pyithu hluttaw hluttaw nih Myanmar vice president caah an thim. March 26 ah tuahmi ramkomh hluttaw ah atu lio Vice President Henry Van Thio le U Myint Swe he President aa cuh lai.
Win Myint hi 1988 liote khan NLD hrihhram he pehtlaihnak thukpi a rak ngei cangmi a si. 1988 kum 8888 mizapi buainak ah a chungpi tiang a rak cawlcang vemi pakhat a si. Cu ruang ahcun nawlngeitu cozah nih voi 3 tiang thong an rak thlak bal. Thong a tlak lio ah a fapa te a zawt zual tuk i ralkap nih na fa maw na thim deuh lai, ramkhel riantuan ti lo dah tiah an rak ti. Ramkhel rian ka tuah ti lai lo na ti ahcun kan in thlah lai an rak ti. Sihmanhsehlaw, ramkhel rian thlah a duh lo ca le a zulhmi lamthluan fekte in aa tlaih ruang ah thong a tlak kar ah a fapa te cu a thi. A fapa ruak hmanh hmu manh lo in ramkhel rian a tuantu a si.
NLD CEC (Central committee) ah saupi chungtel a tuan cangmi a si pin ah atu hi NLD CEC ah secretary chungtel pakhat zong a si. 1988 lio hrawng khan Win Htein, Nyan Win tleicia Win Tin le Win Myint hi NLD party ah zumh bikmi thla pali tiah auhphahmi an si. Daw Aung San Suu Kyi he nai lawng si lo in hlanpi khan naihte in pehtlaihnak a ngeimi le rian a tuanti cangmi an si.
Cu ruang ah 2015 kum thimnak in MP a tlin cangka Daw Aung San Suu Kyi nih Pyithu hluttaw speaker thutdan a pek. Hluttaw Speaker a tuan chung ah upadi le phungphai tampi a serchuahpi khawh hna. A hleikhun in mizapi nih mitthli he an tuarmi le an tahhnawhmi vawlei hmunchuhmi kongkau ah mizapi leikap in fakpi in a tangmi le riantuantu pakhat zong a si. Hi kong ralthate in a tawlrelmi ruang ah mizapi thinlung hmunhma tampi a laak, mizapi nih an upat tuk.
U Win Myint hi mizapi aiawh ah riantuantu a simi le mizapi nih riantuanpiaktu ding ah thlahmi Pyithu hluttaw palai pawl an riantuanmi felfai lo ruang le daithlan ruang ah mizapi leikap in fak ngai le raltha te in bia achim ngamtu le MP pawl a si ngamtu pakhat zong a si. Dinfelnak a tanh ngaimi le thil a dikmi cung ah raltha te le khulrang ngai in hmalaknak a tuah tawntu hluttaw speaker pakhat zong a si tiah theih a si.
Ref: Wikipedia, DVB, BBC
About The Author
