Ramkomh Minister U Nai Thet Lwin Nih Hakha Chin Miphun Ni A Hmanpi Hna (Hmanthlak 25 renglo)

City Hunter| 2018 February 20| 2018 kum February 20, Hakha ah tuahmi Chin Miphun Ni cu Kawlram ramkomh cozah in Tlangcungmi Miphun Kongkau lei ramkomh minister U Nai Thet Lwin nih a hmanpi hna tiah kan theih. Nihin caanhmannak hmanthlak, Khuangcawi dingmi hmanthlak, Zatlang paih ah Rung Lian Ceu aa paih lio tibantuk hmanthlak tampi kan in hrawmh chih hna. A tanglei ah hun rel in hun zoh cio uh.

Ramkomh minister U Nai Thet Lwin cu, Chin Miphun Ni hman ruah ah February 19 ah a nupi he an rak phan. February 20 ah Chin Miphun Hauka catar hunnak a ngeih. Chin Miphun Ni donhhlei cung caanhmannak ah Kawlram ramkomh President U Htin Kyaw nih Chin Miphun Ni sunhsaknak le biarocah cakuat cu minister U Nai Thet Lwin nih relnak a ngeih.

Chin Minister Salai Lian Luai hi Chinram cozah riantuannak le Chin Miphun Ni he pehtlai in forhfialnak a ngeih hna. Minister U Nai Thet Lwin hi Zomi Congress for Democracy (ZCD) party haotu MP Pu Cin Sian Thang nih a rak zulh. U Hung Ngai hruaimi Chin cozah cozah bu minister hlun pawl zong nihin caanhmannak ah an I tel kho cio hna. CNF palai in Dr. Lian Hmung Sakhong le upa dangdang zong an i tel kho tiah kan theih.

Kawlram lemcang thiam pasaltha fitlaw Wai Luh Kyaw zong a rak tlung kho. Kawlram hlasak thiam David Lai, Mai Thawng Za Hnem Sung, Chan Chan, Irene Zin Mar Myint, Zayar le Aung Htet zong an rak tlung kho. February 19 zan ah khan hlasaknak zong an ngei cang. February 20 zan zong hlasaknak an ngei rih lai. Tukum Chin Miphun Ni ringawn tumtu ding band hlanmi cu Mang Za Kam te phu Doron band an si.

Tukum Chin Miphun Ni ah khuangcawi dingmi cu Hakhathar in Mai Run Sung a si. February 19 chun in zatlang paih an thawk I US in a rak tlungmi World Champion Rung Lian Ceu nih minung 6 a tei hna hnu ah bual a co. Zatlang paih ah minung tambik a teitu hi Hakha Khuathar in Zaw Htun a si, minung 16 a tei hna. A changtu cu Hakha Khuathar in Van Ram Awr a si, minung 15 atei ve hna.

Atu hi a phuphu (group) paih an thawk than cang. A phuphu paih a dih in zuamcawh paih an peh rih lai. Zuamcawh paih hi minung 24 in cohlan an si tiah kan theih.

Photo: The Chinland Post

Na ruahning rak langhter ve.. (Leave a comment)

%d bloggers like this: