Ramri khua hna ah thilman a kai tuk
The Chinland Post | 2022 August 22 – India le Myanmar ramri Tamu peng, Kalay peng le Chin ramkulh Kanpetlet, Matupi le Paletwa hna ah thilman a fak tuk tiah theih a si.
Cuka hmunhma pawl hna ah SAC ralkap le mipi hriamtlai karlak ah kahdohnak a fah bantuk in SAC ralkap nih thil luhchuahnak lam pawl a phih caah thilman a kai tuk tiah theih a si.
Ram buainak ruangah Tamu peng ramri gate hna cu India lei nih an phih caah thilri luhchuahnak a um ti lo i arti 1000/- man ah pum 4 lawng a si cang tiah theih a si.
Cubantuk in Kalay-Gangaw, Kalay-Tamu karlak lam pawl ah SAC ralkap le mipi hriamtlai karlak ah kahdohnak a chuak peng i umkalnak a ṭhat lo caah Kalay peng, Tayagone ahcun facang tunkhat ah 35,000 a simi kha 60,000 a phan cang.
Chin ramkulh, Kanpetlet, Matupi le Paletwa hna ah SAC ralkap nih zeipoah a phih dih caah thilman a fak tuk i Mame pakhat ah 300 a rak simi kha 1,000 ah a kai i sii le bang hi cu cawk awk hmanh a um lo tiah theih a si.
Paletwa khuami pakhat nih ” Paletwa cu internet line zong a um lo, khoika hmanh ah kal a ngah fawn lo, atu cu arti pumkhat ah 500, cheukhat dawr cun thonghnih man ah pum 3 le facang tunkhat ah 70,000 a si i Paw-San-Hmuai le bang cu sing 1 a lonh” tiah The Irrawaddy ah a chim.
Chin ramkulh, Paletwa cu Rakhine ram Kuaukdaw, Myaukoo peng hna he aa pehmi a si caah AA le SAC ralkap karlak ah kahdohnak a chuak lengmang.
About The Author
