Ramthlo Khua Ah Nuva Hna Nih Bomrap An I Lamhsual Caah An Nu Nunnak A Liam
The Chinland Post | 2023 April 17 — Chin ramkulh, Falam peng, Ramthlo khua, April 17 zinglei ah Ramthlo khuami nuva hna nih lo an kalnak lam ah bomrap an i lamh sual caah nu cu a nunnak a liam tiah theih a si.
Falam in meng 22 aa hlatnak, Falam-Hakha lamcung ah a um mi Ramthlo khua ah Pu Phun Ci le Pi Ma San hna cu lo an kalnak lam ah bomrap an i lamh sual caah an pahnih in fak pi in hliam an tuar hnu ah an nu cu thi tamtuk a chuak i a nunnak a liam tiah theih a si.
Pu Phun Ci nuva hna cu bomrap ruang ah an orhlei ke le an ban ah hliam an tuar i an nu cu sizung an kalpi lio lampi ah a thi tamtuk a chuah caah a nunnak a liam hi a si tiah theih a si.
Cu hna nuva nih fapa 4 le kum 4 hngakchia nu 1 an ngeih hna tiah theih a si.
A luancia April 6 zong ah Ramthlo khua mipi 19 cu SAC ralkap nih an rak khangh.
