Rian Dinh Ding Ah Timhcia Ka Si; Minister Salai Isaac Khen
City Hunter| 2018 May 14| Atu lio Chin ramkulh cozah bu chung ah rian thlenremhnak le rian dinhter a um lai timi kong ah tu lio Chin ramkulh Sipin le Electric Minister zong a si i Chin ramkulh cozah bu chimnak nawlngeitu zong a simi Minister Salai Isaac Khen nih rian dinhter a kan duh si cun timhcia ka si tiah a chim.
Chin ramkulh cozah bu chungtel rian thlenremhnak kong ah siseh, rian dinhternak le Chief Minister rian dinhter a si lai timi kong he pehtlai in Minister Isaac Khen cu The Chinland Post nih May 14 zingka ah pehtlaihnak kan tuah i atu bantuk in a kan leh.
“Chief Minister rian dinhter a si lai timi kong cu cozah bu nih kan hngal bak lo. Keimah pumpak zong in an dinhter lai maw dinhter lai lo timi cu ka chim khawhmi a si lo. Cun, Chinram cozah bu chung in minister cheukhat rian thlenremhnak a um lai timi zong result a chuak rih lo. Rian thlenremhnak tu cu a um theu ko lai.”
“Keimah cu mizapi nih thimmi le minister rian pekmi ka si lo. Cucaah, minister rian tuan ding in rian a kan pek lio zong ah nawlngaite in an bia ka ngaihpiak hna i ka si khawh chung in riantuan kaa zuam. Rian a ka petu nih i din ko, i phuak ko a kan ti si le rian i dinh ding le rian i phuah ding ah timhcia ka si ko. Keimah bantuk hi ramkulh le ramthen kip ah kan tampi cio. Rian a kan petu nih a herhning in an kan dinhter khawh. Mizapi nih thimmi kan si lo caah anmah bia zulh le nawlngaite in riantuan kan tuan ko. Na biahalmi he pehtlai in keimah pumpak nih rian dinhnak ca tial le tial lo kong tu cu kaan chim kho lo” tiah The Chinland Post ah a chim.
Hi kong he pehtlai in Chin ramkulh hluttaw Speaker Pu Zo Bawi pehtlaihnak kan tuah i kan chim kho hna lo, cozah bu kha hal ko hna uh a kan ti ruang ah atu bantuk in Chin ramkulh cozah bu chimnak nawlngneitu minister Salai Isaac Khen biahalnak kan tuah hi a si.
Minister Pu Sui Thio nih, “Nihin riang minister rian thlenremhnak result cu a chuak rih lo. May 10 ahkhan Chief Minister le tuanvo ngeitu upa Naypyidaw ah ton biaruahnak le ceihmainak an ngei dih ko cang. Chief Minister nih zeihmanh a kan thanh in a kan chim rih lo. Nihin asiloah tuzarh chung cun aa fiang dih ko cang lai. Rian dinh a um lai maw timi cu ka hngal bak lo. Cun, Chief Minister rian dinhter a si lai tiah thawngpang aa leengmi hi cu keimah pumpak cun ka zum bak lo. Zei ruang ah ti ahcun kan Chief Minister hi Khrihfa a si pin ah a dingfel tuk. A kan thithruaining zong a tha tuk. Mizapi sin ah thil sual a tuahmi le min chiatnak taktak zong a ngei fawn lo” tiah May 14 zingka, The Chinland Post ah a chim.
Chin ramkulh hluttaw Speaker sin in a hmasa bik ahcun minister pakhat rian kan dinhter lai media sin ah a chim. Cu hnu ah minister pathum, Salai Isaac Khen, Pu Sui Thio le Pu Pau Lun Min Thang an rian thlenremhnak a um lai tiah media sin ah a rak chim. Rian an tei lo ruang le rian an teinak ding ah rian thlenremhnak tuah kan timh hi a si ti zong a rak chimchih.
Lam le Sul lei Pehtlaihnak minister Pu Sui Thio hmun ah Pau Lun Min Thang, Sipin, Electric le Industry minister Salai Isaac Khen hmun ah Pu Sui Thio le Social Affair Minister Pu Pau Lun Min Thang hmun ah Salai Isaac Khen ti in rian an i thleng lai tiah May thla zarhkhatnak in thawngpang a leeng.
Minister Salai Isaac Khen hi rian dinhter a si lai maw si lai lo timi aa fian hlan ah Chin mino le upa cheukhat nih rian dinhter an duh lonak siseh, amah hi Chin minister lakah a qualified bikmi a sinak siseh, amah tluk rian thiammi le rian tuan kho ding an um ti lai lo tih an sian lonak le an bochannak kong social media siseh, Kawlram media lakah a ngan pawl a simi Irrawaddy thawngthanhca tiang nih a tial tiah kan theih.
About The Author
