Ramkomh Cozah He I Ceihruah Dih Hnu Lawng Ah Ramri Kong Kan Tawlrel Lai; Chief Minister Salai Lian Luai
City Hunter| 2018 May 14| Chin ramkulh ramri a simi Magwe ramthen le Sagaing ramthen ramri kongkau cu ramkomh cozah le ramkulh cozah cio i ceihruahnak ngeih dih hnu lawng ah kan tawlrel khawh te lai tiah Chin ramkulh Chief Minister nih a chim.
Chin ramkulh ramri he pehtlai in 2017 zong ah i alnak le buainak a chuak. Cu pin ah Magwe ramthen le Chin ramkulh thlanglei zong a fiang lomi ramri kong buainak a um rih.
Hi kong he pehtlai in Chin ramkulh Chief Minister Salai Lian Luai nih, “Ramri kong ah Chinram cozah nih committee kan ser cang, ramkomh cozah zong nih an ser cang, a hlan zong ah thiamsang hna nih pe zong an tah dih cang. President sin capek tiang zong a um i hlan cozah chan zong ahkhan an tah than cang. Cu ruang ah kanmah Chin miphun duhnak le cohlannak lawng in a ngah lo, ramkomh hluttaw tiang chuahpi a hau” tiah a chim.
“Kanmah Chinram cozah, Magwe ramthen cozah le Sagaing ramthen cozah zong biakhiahnak tel lo, i ceihruahnak sawhsawh kan ngei cang. Hi kong cu ramkomh cozah cung ah aa hngat” tiah a chimchih.
Ramri kong he pehtlai in Chin Siangngakchia Bu zong nih rianrangte in kan tawlrelpiak uh tiah cozah sin ah forhfialnak an tuah tiah kan theih.
Chin Siangngakchia Bu (Chin Student Union) in Vice Chairman Van Thawng Thang nih, “Ramri kong he pehtlai in Kalay ahkhin ahlan ahcun Monlai in khualuh hauka tung bunh a rak si. Atu cu 9 mile tiang an thawn cang. Hi kong cu kumhra tluk a simi ngakchia hmanh nih an hngalh dih ko lai. Hiti ramri lonhpiakmi le ramri entaimi hi federal ramkomh a si ahcun a biapi in tawlrel a haumi a si” tiah a chim.
“Ramri kongkau cu tualchung mi he zong i ceihruah a hau. Khuakhat phak ah a konglam phundang, khuadang hun phak than ah phundang tibantuk in tuanvo ngeitu cheukhat mizapi he an i pehtlaih, an i chawnh biak tikah ningcanglo in i biakchawnhnak le riantuannak a um theu. Cozah nih ramri kong dikfelte in fianhnak an tuah ding zong a forhfial chih hna.”
Ref: Chin World
About The Author
