Rihkhawdar Khuami Nih Chinram Cozah Sin Ah Duhlonak An Langhter Lai
Rih Tidil
Salai Elvis| 2018 May 4| Falam peng Rihkhawdar khuami nih an khuatlaknak Diamond Jubilee lungphun mi hmunhma kongah Chin ramkulh cozah nih nawl an pek lonak hna kong le a phunphun in an phihkhar lengmang hna caah khuami nih May 5 ah duhlonak langhter an timh hnawh hna tiah thawng kan theih.
Rihkhawdar khua kum 76 tlin camtuak Diamond Jubilee puai cu April 4-5 tiang rak tuah a si. Hi an lungphunnak hmunhma- khuami lungtling tein ham cangmi hmun cu Chin ramkulh cozah nih nawl a pek hna lo pin ah Rih tidil hi khualtlawng mi hna caah an humhaknak thawng in khuami cu Rih tidil kam leikuang vialte tuah ti lo dingin an kham hnanak, Rih tidil chungah nga tlaihnak nawl, ti lionak nawl le lawng citnak nawl tiang in an kham hna caah a tubantuk in ramkulh cozah sinah duhlonak langhter kan timh hi a si” tiah Rikhawdar khuatlatu Pu Ram Hmung i a tunu a simi Pi Lal Thansangi nih a chim.
“Kan pipu chan lio in pawcawmnak caah rak tuah cangmi leikuang vialte hi kan chuahtak kho lo. Rih tidil chung ah nga kan sio, ti kan i lio, leikuang kan tuahnak thawngin Rih tidil cu aa rawk le rawk lo khuami hi a hngal bik kan si. Cucaah a tubantuk in an kan khammi hi khuami nih kan duh hrimhrim lo. 1942 kum lio in khua tlatu kan pipu hna nih hi tidil thawng in kum 70 tluk pawcawmnak caah an hman cang, an hman thawngin Rih tidil cu a rawk hlei lo” tiah Pi Lal Thansangi nihcun a biapeh ah a chimchap.
Hi kong he pehtlai in ramkulh sinpin vuanci nih duhlonak langhter an timhmi nak in ramkulh cozah le khuami hna tonnak ngeih hmasa ah a tha bik tiah a chim.
“A si ning te ahcun Diamond Jubilee lung an phun hlan in ramkulh cozah he tha tein i ceihkhannak rak um ta seh law, hmunhma kan pek hrimhrim ko hna lai. Lam cungah duhlonak langhternak cha cun tlamtling tein ceihkhannak rak tuah hmasa kha a biapi” tiah ramkulh sipin vuanci Salai Isaac Khen nih a chim.
Rih tidil cu ramkulh cozah nih kum saupi nguhding in humhakmi a si i a chung um nga hna cu a rauh hlan ah a keuh ding an si caah ngatlaih an khamnak le hi tidil chung ah alhhang (lawng-sar-sii) aa cawh lai phan ah lawngcit zong kan kham hi a si tiah Chief Minister Pu Salai Lian Luai nih a chim.
Rihkhawdar khuami minung 300 tluk nih May 5 chun suimilam 12 tluk ah a tu bantuk in Rih tidil in i thok in duhlonak an langhter lai tiah theih a si.
Ref: Khonuamthung Burmese
About The Author
