Ruah Pehzulh In A Sur Caah Lailenpi Le Rezua Kar Khualtlawng Harnak An Tong

Salai Elvis| 2019 July 11| Ruah pehzulh in a sur caah Mindat pengkomh, Matupi peng chung telhin Lailenpi le Rezua karlak lam cheukhat aa rawkmi a um caah khualtlawng mi harnak an tong tiah kan theih.

June thla dih ka in ruahti a tam caah Lailenpi khua kiangkap mincimhnak, tilianhnak le thingkung an pur caah khualtlawng mi hna harnak an ton hi a si.

“Hawi pakhat he Rezua in zingka tein kan i thawh ruahpi cat lo in a sur caah lam thluanchuak lam an min, ti an lianh caah kan mah lawng nih kan ti khawh lo tikah hawi kan hngak hna i Cycle cu minung pali nga kan i zawn hna. Lam pi ti lianhnak hi hmun 3 hrawng ah a si” tiah khualtlawng pakhat nih a chim.

Rezua le Lailenpi kar lam a rawhnak hmun ah lamzung nih theng(seh-kyi) chiah a si ko nain hmunkhat hnu hmunkhat lam a rawknak aa hlat pin ah ni khat hnu ni khat  lam minh a tam caah a caan chung ah an tuanchuah khawh lo caan zong a um.

“Leivor le leimin mi cu nichiar te kan tuah peng ko. Sabong khua le Ruamang khua karlak hi a bik in a har i a zual cemnak a si. Chun ah kan tuah i zan ah a min than thiam. Cu tuahnak caah Diesel (alh-hang) zong a tlawm tuk cang, a si nain Diesel ngaltu motor zong lam a that lo cun an kan chan kho hoi lo. Ruah pehzulh in a sur peng ko ah cun kan Diesel nih an kan nguh lai lo” tiah Seh-kyi khal tu pakhat nih a chim.

Lailenpi le Rezua karlak cu khaan (meng) 60 tluk aa hlat i hi khua hnih karlak cu kum chiar te Fur caan paoh ah lam a rawh peng caah cozah riantuan le khuami hna harnak an tong peng tiah kan theih.

(Ref:iprd Lailenpi)

Leave a Commnet

%d bloggers like this: