Thantlang Khuachung Phungninglo Hnawmhlonh Mi A Hmutu Nih Phuan Ah Cun Lawmman 50% An Pek Hna Lai

Salai Elvis| 2019 July 11| Thantlang khuachung thianhlimhnak kongah phunning lo le daithlang tuk in hmun hnawm a hlonhmi hna a hmu i sipin zungah phuannak (report) a rak tuahtu hna cu lawmman laksawng 50% pek nan si lai tiah Thantlang sipin nih July 5 ah nawl a chuah.

Chin ramkulh sipin nawlngeitu hna caanhman tonpumhnak (13/2019) biachahnak 37 (q)ning bantuk in khua chung thianhhlimhnak le riantuan lio ah phungning lo in hmunhnawm a thle in a hlonhtu hna a hmumi nih thawngthanhnak a kan tuahmi cu dantatmi chungin 50% cu lawmman laksawng pek an si nak lai biachahnak an ngeih mi cu July 1 ah Thantlang khua zong theihternak ca kuat an si.

Cucaah Thantlang khuachung zong ah phungning lo in hnawm a thle tu hna zong fakpi in dantat an si lainak kong, hnawm an thlet a hmu mi nih a tanglei pehtlaihnak  (ph: 070-60096, 09897090310, 09454477440) le zungah phuannak (report) tuah khawh a si nak cathanh chuah mi ah aa tel.

Cubantuk in khuachung lampi pawngkam dawrkhan le inn chungkhar khuasa mi hna nih hnawmbawm ah hman mi, Caku bawm, Sala-eih le Thingngiah chiahnak bawm cu hman ti lo ding le, khuapi he aa tlakning in hnawm bawm tha mi tein July 6 hlan ah nan thlennak lai, zohfelnak ngeih tik i a thleng lo mi cu fakpi in dantat an sinak lai le nan inn le dawr hmai cio thianhhlimhnak nan tuah dih cio nak lai tiin Thantlang sipin nih thawngthanhnak a tuah.

Leave a Commnet

%d bloggers like this: