SAC Hi ICC Ah Biaceih Ding In UN Commissioner of Human Rights Nih A Chim
Salai Mangpau | July 7, 2022 — UN Commissioner of Human Rights Mr. Volker Turk nih SAC ralhrang nih Myanmar ram uknak a lak ni in nikhat hnu nikhat an tuah serning le an sualning a zualhma chim caah UN Security Council nih The International Criminal Court (ICC) ah bia ceih ding in Mr. Volker Turk nih UN Human Right Council a voi 53nak meeting tuahnak Switzerland ram Geneva khua 2023- July 6 ni ah a chim.
“Myanmar ram mipi harnak an ton mi hi ruah lo ning in an tuar fak ngai. SAC nih uknak a lak hnu in Myanmar ram mipi nih an duh mi ram daihnak, Democracy ṭhanchonak lam vialte an hrawh. Sipuizi le pawcawmnak a ṭumchuk thluahmah ruang ah mipi an harsa ngai cang. An ram vawlei thilchuak thilman sung vialte phungning lo in an tuah caah Myanmar ram vawlei pawngkam kokek thil vialte an rawk” tiah UN Commissioner of Human Rights Mr. Volker Turk nih a chim.
Cun, “SAC uknak ah mipi cu phungning lo in tlaihkhihnak, le hrennak a tuahser mi a zual chin. Media rianṭuannak zalongnak a tlau. SAC ralhrang an sual tuk caah ramchung um Tlangcung khuasa mi tlawmdeuh hna cu an khuachuah tak in ramri pawngkam ram ah an tli an zaam. Rohingya miphun sang 10 hlei cu Vawlei cung Refugee camp a liam cem hmun Bangladesh ram ah nihin ni tiang an ram kir kho lo in an um rih. SAC nih hramhram in uknak a lakhnu ah sualnak ngei lo mipi 3,700 hlei an thi i tlaih a tong mi 23,700 hlei an um. Mah cazin hi kan mah hnatlakpi mi a si. Mah nak tam deuh a thi mi le tlaih a tong mi an um ko rih lai. SAC nih vanlawng kahnak a tuah chin lengmang hlei ah ramchung mipi inn a khangh mi 70,000 hlei a si. Vanlawng kahnak ah Sagaing ramṭhen Pazikyi khua bomb tlaknak ah mipi 168 an thi. SAC nih International Human Right phunglam nawl an buar, Upadi zei a rel lo” tiah Mr. Turk nih a ti.
“Cu hlei ah mipi harnak a tong mi bawmchannak thilri vialte SAC nih lam a kham rih. Nikum ah mipi ei din zatuak 177% pek nak ah a thangcho ngai nain, SAC nih ramkhel kong ah thongtla mi 19,000 hlei thonginn chuah ding in nawl kan hal hna. UN Security Council nih Nuhrin Covo le International phunghram nifatin nawl a buar mi Myanmar SAC cu International Criminal Court (ICC) biaceihnak zung ah chuahpi in an kong ceih le a zizut ding a si” tiah a chim chap.
Biadonghnak ah kum tampi ralhrang uknak ah harnak an tong nain Democracy hmuhnak caah nunnak thap in raltu ngam mi Myanmar mipi kan upat hna. Ram mipi he raltha in hmai kan nor ṭi lai tiah UN Commissioner of Human Rights Mr. Turk nih UN Human Right Council a voi 53nak meeting tuahnak Switzerland ram Geneva khua ah July 6 ni ah a chim.
About The Author
