SAC hriamnam sernak Kapahsah No. 3 Sin Hte in SAC ralkap mi 20 leng an tli kong ah Sehzung uktu Colonel Maung Maung Soe nih a chim Duh lo
The Chinlandpost | October 24, 2023 — Bago ramthen (nitlak lei) Pan Taung peng, Sin The hrambunh no 3. Ralkap hriamnam sernak sehzung in September in October 2 ni tiang thlahnih chung ah SAC ralkap 20 an tli tiah Ka-pah-sah no. 3 he naihniam mi sin in thawng theih a si.
SAC chuak tak in a tli/zaam mi hna hi Battalion chung ah hruaining celh ti lo in a tli mi an tam. An tliknak chan cu outpass – leng lei chuahnak nawl hal in hni puan zunkhat tein a leng an chuah hnu ah a kir ti hna lo. A leng an chuah tik ah mah le timh ning cio in mi pakhat, mi pahnih in pathum tibantuk in a leng chuahnak nawl hal in an tli hna. Atu kah-pah-sah no.3 battalion ah ralbawi telh in ralkap 1000 hrawng a um i thlahnih chung ah ralkap 20 an tli tiah Commander Colonel Maung Maung Soe nih cunglei bawi sin ah thawngpeknak a tuah ngam lo. Cun a tli mi hna ralkap thlahlawh, eidin, le ralkap ngeih mi U Piang company tangka chiah mi pawl cu commander pa le ralbawi Major Pyint Phyo Aung, Captain Yar Zar Tun le Captain Ar Kar Phyo hna nih battalion chung um innchungkhar eidin pek mi kong ah an duh paoh in mah pumpak miaknak caah an lak ṭheu tiah BMC News nih a langhter.
Ka-pah-sah Hriamnam Sernak Hmunhma
Nihin Myanmar ram chung ah SAC ralhrang hriamnam sernak (Kapahsah ‘ကပစ’) hi hmun 25 ah a um. Myanmar ram chung hmun lai le tlangphen deuh ah an um hna. Kapahsah nih a ser mi hriamnam ah Ke ralkap hman mi hriamhme meithal, Bomb, Kuan, in Vanral ah hman mi hriamngan an ser. Myanmar ram chung ka-pah-sah Sehzung a dihlak fonh ah vawlei Acre sang (100,000) a kau lai tiah zumh a si.
Myanmar ramchung ah Ka-pah-sah sehzung 25 an um. Mah chung ah Magwe ramthen ah 15, Bago ramthen 7, Naypidaw (Tatkung) ah 2 le Yangon peng (Taikkyi) ah 1 an um. Sehzung umnak hmun hi Tlangcung hriamtlai he aa hlatnak ramchung hmunlai cem ah an um.
Ralkap bawizik Than Shwe chan ah Magwe ramthen ah mipi vawlei hramhram in a lak mi vawlei hmun ah Kapahsah hriamnam sehzung a ser hna tiah theih a si.
Magwe ramthen Ka-pah-sah hriam sernak hmun tam deuh hi Ayeyawaddy tiva hnu lei ah an um. Cheukhat sehzung hi Khuachung in meng 4 in meng 30 a hlatnak tlanghram le internet/phone line pehtlainak a umlonak hmun ah an um.
Kapahsah 3 (ကပစ ၃)
Bago ram, Pyi peng khat lei ral Sinhte khua pawng ah Ka-pah-sah 3 sehzung hi (18°46’37.68″N 95°11’24.44″E) ah a um. Mah sehzung in 60 MM, 81 MM, 120 MM bomb le 50KG, 100KG, 200KG, 250KG, 500KG a rit mi vanlawng bomb an ser. Sehzung riantuan mi 2000 hrawng a um. Sehzung uk ah Colonel Maung Maung Soe a si.
Photo/ ကပစ ၃ Sehzung bawi Colonel Maung Maung Soe
About The Author
