SAC Nih Hramhram In Uknak An Lak Hnu Ah Myanmar Ramchung Mipi 15 Million Leng Eiawk An Harsa Tiah UN Security Council Ah U Kyaw Moe Htun Nih A Chim
The Chinland Post | 2023 August 4 — Myanmar ram ah SAC nih hramhram in uknak a lak hnu thawk in ramchung minung 15 million leng eiawk an harsa tiah UN Security Council sin ah Permanent Representative of Myanmar U Kyaw Moe Htun nih a chim.
August 3, American ram, New York khua hrambunh UN Security Council ah “Famine and Conflict-Induced Global Food Insecurity” tlangtar in High-Level Open Debate ah U Kyaw Moe Htun nih atu bantuk in a chim hi a si.
Atulio Myanmar ramchung ah minung 15.2 million nih eidin harnak an tong, cun 1.9 million hrawng minung hna nih innlo an zaamtak, ramchung ah hngakchia tampi vitamin an chanbau, WFP nih a langhter mi cazing ning ah buaktlak in kum 5 tang hngakchia 3 chung ah 1 hi cu an ngandam lo i 7% nih vatamin dat an bau tiah a langhter.
Cun SAC ralkap nih mipi umnak hmunhma pawl ah vanlei kahdohnak a tuah ruang le hriamngan a kah ruang ah ramchung minung 1.6 Million nih innlo an zaamtak i mipi inn 70,000 leng SAC ralkap nih an khangh cang tiah a chim fawn.
Cu Security Council Meeting tuah caan a phan mi US ram hruainak in an tuah i US ramdang lei Minister nih a hruai hna i UN Famine Prevention and Response Coordinator a si mi Ms. Reena Ghelani, International Rescue Committee President le Chief Executive A si mi Mr. David Miliband le Edesia a dirhtu Ms. Navy Salem hna minung 3 hna zong an kai kho. Meeting ah Myanmar ram telh in ram 80 leng aiawhtu pawl an kai kho tiah theih a si.
About The Author
