SAC Nih Kachin Ram Northern Commander Major General Ko Ko Maung Thong Kum 10 Thlak Ding In Bia An Khiah
The Chinlandpost | October 25, 2023 — Kachin ramkulh, Myitkyina hrambunh, Northern Commander Major General Ko Ko Maung cu SAC nih thong kum 10 thlak ding in biakhiahnak an tuah cang tiah theih a si.
Northern Commander Major General Ko Ko Maung telh in Northern command hruainak a um mi Deputy Commander Brigadier Aung Myo Oo, Kachin ramkulh chungtel Colonel Aung Kyi Lin (Border Affairs Minister), Hpakant Camp Commander le Officers-2 hna tlaih an si hnu ah, a tu Tuluk (China)-Myanmar ramri Boarder trade gate hngak Kanpaikti khua hrambunh ralkap LID 389 battalion Commander Lieutenant Colonel Hla Moe hna hi SAC nih July thla 13 ah an rak tlaih cang mi hna a si.
Commander Ko Ko Maung hi Anantpa khua buainak lio ah mibu tampi thahnak nawl a petu a si. Northern Commander a tuannak kumkhat a tling rih lo. Kachin ram a rianṭuannak a chiahru ngai. Hpakan peng um KIA hotu bawi sin ah ton biaruahnak a ngei i Pyakant lunghring (Jade) a fir. Tuluk (China) ram mirum (lawpan) he vawlei tang chuak thil mansung an fir. NDAK he komh in Sui (Gold) an co. Hpakan ah Mine (bom) phorhnak nawl a onh i mipi ralkap sin ah kuan zen tampi a phan. Anantpa khua mibu tampi a rak thah ruang ah Naypidaw zung lei nih an rak zumh mi cu atu mah pumpak rumnak caah a ṭuan. A tu KIO/KIA Headquarters kahnak ah Naypidaw in fial a si nain an sipuazi (chawleknak) a zor sual lai tiah KIO/KIA biatak in a kap duh ti hna lo tiah SAC lei nih lunghrinh mi ralbawi a si.
July 23 ah Sa Dung khua SAC ralkap le Lisho Pyi tuh Sit ralkap fonh in an zapi 60 nih LID 389 Commander Lt. Colonel Hla Moe tlaih ding ah an kal. Commander pa Kanpaikti gate in a tli sual lai tiah an va tlaih timh hi a si. July 24 tiang an rak kir rih lo. Tangka eihmur mi a tam. Kuan le zen ramchung luhpinak ruang ah kan hnu lei ah Northern Commander bawi liam mi 6 an tlaih hna hnu in atu Battalion chung a um mi bawi hi tlaih ṭhan an timh hi a si tiah naihniam SAC ralkap nih an rak chim.
Cun, Myitkyina-Bhamo lam LID 321 bawi pakhat Kazu khua gate hngak bawi le Kandaung khua gate hngak bawi zong tlaih an si.
Northern Commander Major General Ko Ko Maung le a kuttang um ralbawi ngan 6 cu July 13 zaan 8:30pm ah SAC head Quarter umnak Naypidaw zung in an rak tlaih hnu ah Major General Ko Ko Maung ai ah Kalaymyo hrambunh 10th Military Operations Command (MOC-10) စစ်ဆင်ရေးကွပ်ကဲမှုဌာနချုပ်, စကခ -10 Commander Brigadier General Soe Hlaing cu Northern Division Commander ah an chiah.
About The Author
