SAC nih tuah a timh mi thimnak ah i tel lo ding in khuachung kahdohnak a tuahtu phu nih nawlnak an tuah
The Chinland Post | 2022 October 6 – SAC nih tuah a timhmi thimnak ah i teltum lo ding le bawmh lo ding in Special Task Agency of Burma – STA nih nawlnak a thanh.
Hramhram in uknak a latu SAC cu PDF le tlangcung hriamtlai phu pawl nih an dohmi buainak, mipi pawl nih SAC uknak an cohlan lomi buainak, vawlei pi le Myanmar ram Democracy kong a cawlcangtu pawl, ramdang cozah pawl he palai kong buainak tiah amah dohnak tampi kha a ton. SAC nih a tonmi buainak pawl chung in a luat khawhnak hnga 2023 ah thimnak tuah aa timh hi a si.
SAC luatnak kan phih khawhnak hnga a biapi mi cu ramkhel party pawl hi an si i 2023 thimnak a chuah khawh lonak hnga ramkhel party pawl nih fak piin an tawlrel a hau. Cucaah SAC nih a tawlrel mi thimnak ah registration (hmat-pung-ṭin) tuah lo le thimnak kha a tha ṭhawnter lo ding in STA nih October 5 ah ramkhel party pawl kha forhfialnak le nawlnak an tuah.
SAC he fonh in thimnak ah aa tel mi, thimnak a chuah khawhnak hnga a bawmtu le thazang a petu party pawl nih nikhat khat ah an an tuar ṭhan lai tiah theihternak a tuah.
SAC nih 2023 August thla chungah thimnak a tuah khawhnak hnga vote cazin zohfelnak, vote peknak hmunhma pawl hna a khiah cang tiah theih a si.
About The Author
