SAC Ralhrang Nih Mipi Inn A Khangh 75000 A Phan Cang
SAC Ralhrang Nih Mipi Inn A Khangh 75000 A Phan Cang
Salai Mangpau | September 9, 2023 —
Myanmar ram ah SAC ralhrang nih uknak a lak hnu ah mipi inn mei a khangh mi 75,000 a phan cang tiah United Nations Office for the Coordination of Humanitarian Affair (UNOCHA) nih September 8 ah cathanh a chuah.
Myanmar ram chung ah SAC ralhrang nih mipi thaihhrem le thahnawm ruang ah inn le lo chuah tak in a zaam mi minung sing 19 leng an umnak kong cu (UNOCHA) nih cathanh a chuah.
Myanmr ram pumpi chung ah SAC ralhrang nih uknak a lak hlan ah minung 370,000 hrawng nih inn le lo an chuah tak I SAC ralhrang nih uknak a lak hnu in minung sing 19 leng nih inn le lo an chuah tak cang tiah theih a si.
Myanmar ramchung nichuah chaklei ah kahdohnak a fak chinchin i khuami hna nih an chuahkehnak inn le lo khua an chuah tak tiah UNOCHA nih cathanh a chuah. Mah ralzaam pawl hi Karenni (Kayah) ram, Karen, Mon, Thaninthari, Bago, Sagaing, Magwe, Chin ram hna an tam tiah theih a si.
February 1, 2021 kum in SAC ralhrang nih hramhram in uknak a lak hnu ah Krihfa biakinn 70 leng an khangh. Myanmar ram nitlak lei Chinram chung ah Biakinn 62 leng khangh a si cang tiah OCHA le Asia Roman Catholic Khrihfabu hna nih June thla ah thawngzamhnak an rak tuah.
Date For Myanmar phu zong nih SAC uknak a lak hnu kum hnih le cheu chung ah ramchung mipi inn a khangh mi (74,874) tiang a si cang tiah August 9 ni ah cathanh a rak chuah.
About The Author
