SAC Ralhrang Vanlawng Kahnak Ruangah Khampat Khua Phungki Sianginn Telh In Inn 30 Leng A Rawk
The Chinlandpost | December 21, 2023 — Khampat khua kahnak ah ahnu bik a tang mi ralkap sakhan cu November 7 ah mipi ralkap nih an lak khawh cang.
Khampat khua kahdohnak a chuah hnu a ni 4 nak November 7 ni ah ralkap sakhan hi an lak. Sakhan chung a ummi ralkap hi mipi ralkap nih ni 4 chung an kulh, an kah peng i, eidin tirawl an ngei ti lo caah sakhan an rak tlik tak.
SAC ralhrang lei nih Khampat khua cu lak than ding in December 10 ah SAC ralkap 200 hrawng an rak kai than lio ah vanlawng in ni 5 chung bom a thlak caah Khampat khua No. 1 sang um Buddhist phungki sianginn le inn 30 leng a rawk tiah theih a si. SAC ralkap pawl cu PDF Sagaing Special Force, pengkomh PDF, Bakaphah le tangti mipi ralkap hna nih an rak doh hna i, December 16 ni ah SAC ralkap pawl an thi mi le a tli mi hna cu Khampat khua lut kho lo in an um tiah NUG Defence Ministry lei nih thawngthanhnak a tuah.
Mipi ralkap lei nih SAC hriamnam MA-10 RPG 7, MG-3 zunn 1, MA-S1 MK2 telh in meithal phuntling 17 an lak khawh. Ralhrang bawi pakhat telh in ralhrang 10 leng ruak an hmuh tiah an langhter.
A tu lio Khampat khua ah kahdohnak a um ti lo caah No. 1 sang telh lo in sang dang pawl cu khuachung ah a rak kir mi an tam i cheukhat cu ralzaam in an um rih ko tiah theih a si.
Asia highway lampi umnak Kalaymyo -Tamu-Khampat lei le Kalay-Gangaw lei um pawngkam khuate SAC sakhan cu mipi ralkap nih November 3 zing ah kahdohnak an rak thawk i Khampat myoma palek sakhan le Wihthok ralkap sakhan cu November 3 ni ah an rak lak cang. Khampat khua ah ralkap le palek sakhan pahnih an um.
July thla Khampat khua kahdohnak ah SAC ralkap 13 an rak thi. Helicopter in an hun chiah mi SAC ralkap an kalnak lam ah mipi ralkap nih bawhtonh in an kah hna caah ralhrang lei 13 an thi tiah theih a rak si. “Chunnitlak kahdohnak a um. Hriamngan kahnak cu ruah sur bantukin ralhrang lei nih an kah ko. Anmah lei 13 an thi. Kanmah lei ralkap pakhat an khen” tiah Tamu PDF battalion 4 hruaitu Bo Khant nih a rak chim. Kalaymyo lei in SAC ralkap pawl cu tanglei in an rat ngam ti lo caah Helicopter nih ralkap cu khua nichuah-chak lei leikuang ah a vun chiah hna. A hnu ah helicopter cu Kanan leikuang ah a tum ngam ti lo caah anmah sakhan pawng ah a thumh cang hna. Khampat kahdohnak he pehtlai in Tamu peng Mipi ralkap hruaitu pakhat cu SAC nih an tlaih hnu July 22 zaan suimilam 8:00pm ah Khampat No. 1 um mi SAC ralkap sakhan le police sakhan cu Tamu peng ummi hriamtlai phu dihlak fonh nih an kah bal hna.
Photo/ Credit Khonumtung Burmese
About The Author
