SAC Ralkap 416 India Ram An Lut Cang Tiah India Ralkap Ralbawi Nih A Chim
SAC Ralka 416 India Ram An Lut Cang Tiah India Ralkap Ralbawi Nih A Chi
The Chinland Post | January 15, 2024 — Chin ramkulh ah a cang mi kahdohnak pawl chung in India, Mizoram le Manipur ram ah a zaam mi ralkap 416 cu Myanmar ram ah an kuat ṭhan cang hna tiah India ralkap ralbawi General Manoj Pande nih New Delhi thawngzamh sin ah a chim.
Myanmar ram buainak ruang ah India-Myanmar ramri hauruang kulh ding in timhtuahnak cu central cozah nih Manipur-Myanmar lei kap cu hauruang an kulh nain Mizoram-Myanmar ram lei hauruang kulh ding cu Mizoram cozah le CYMA nih an duh lo tiah tiah a si.
India he ramri aa tlai mi Chin ramkulh ah 2023 November in 2024 January 2 tiang a cang mi kahdohnak voi 5 chung in ralkap an zaam hi a si i Assam Rifle nih an cohlan hna hnu ah an kuat ṭhan hna hi a si.
2023 November 12 ah India-Myanmar ramri, Rihkhawdar khua um ralkap sakhaan 2 cu CNA, CDF-Hualngoram, CDF-Thantlang le People Defense Army hna nih an kah. Kahdohnak chung in ralkap lei 34 cu Mizoram, Champhai pengkomh, Zawkhuathar ah an zaam. Anmah pawl cu Assam Rifle nih India ralkap Helicopter in Mongnai khua in Tamu ah an kuat hna.
Khampat-Tamau pawngkam kahnak ah SAC ralkap pawl Indiaram lei a tli mi zong an um chih.
November 15 ah Falam peng, Tibual ralkap sakhaan in ralkap 40 leng zong India ram ah an zaam. Mizoram, Tusentlang khua in Assam Rifle sin ah an i ap i cu hnu ah Myanmar ram, Tamu khua ah India ralkap Helicopter in an kuat ṭhan hna.
2023 November 19 ah Matupi peng, Lailenpi khua hrambunh LIB 304 ralkap sakhaan cu Chin dothlennak phu pawl nih an lak lio ah ralkap chungtel 30 cu Mizoram, Siaha pengkomh ah an zaam ṭhan. Anmah pawl zong India ralkap Helicopter nih Myanmar ram ah an kuat ṭhan hna tiah ramri khuasa pawl nih Mizzima ah an chim.
Paletwa peng, Myeik khuate pawng ah a um mi ralkap Point 377 sakhaan cu AA nih December 2 ah an kah hna i ralkap 15 cu Mizoram, Lawngtlai peng, Suisatlang khua in India ralkap sin ah an i dor. January 2 ah Lengpui vanlawng tual in ralkap Helicopter nih voi 2 an thir hna i Sittwe khua ah a kuat hna tiah All India Radio nih a thanh.
Cun Paletwa khua, Chinletwa sakhaan cu AA le MDF nih January 2 ah an lak lio ah ralkap 104 cu Mizoram, Siaha pengkomh chung ah an rak zaam. January 9 ah ralkap vanlawng nih Aizawl khua, Lengpui vanlawng tual ah a rak lak hna.
India ram chung a rak phan mi kawl ralkap hna kha Myanmar ram ah hramhram in va kuat ṭhan lo in anmah duhning tein tawlrel piak ding a si tiah India for Myanmar nih India cozah sin ah ca an kuat.
Photo- India army General Manoj Pande le an ralkap pawl
About The Author
