SAC ralkap nih Rihkhawdar ramri gate an lak lioah an tlaihmi CNDF hriamtlai 2 an ruak an hmuh
The Chinland Post | 2022 April 19 – Chin ramkulh, Falam peng, Rihkhawdar khua rami hlei pawng CNDF sakhaan cu March 26 zinglei ah SAC nih an lak. Cu lioah tlaih a tongmi CNDF hriamtlai 2 an ruak cu April 18 ah khuami hna nih an hmuh ṭhan tiah theih a si.
March 26 kahdohnak ah rawl a chuangmi CNDF hriamtlai 2 cu SAC ralkap nih an tlaih hna i cu ni ṭhiamṭhiam ah meithal in an kah hna.
April 17 ah dum ngeitu pakhat nih a dumchung a zoh lio ah a rim nam mi a theih ruangah a kawl i a dum pawngah vawlei an ponmi a hmuh. Dum ngeitu pa nih Rihkhawdar khuanu khuapa thawng a thanh hna hnu April 18 zinglei ah vawlei ponmi cu an cawh ṭhan i an ruak cu an umnak khua ah an kuat i ṭha tein an vui ṭhan hna.
An ruak an chuah ṭhan lio a um vemi pakhat nih “Pe hnih hrawng a thukmi khor chungah phum an si. An mui cu i chinchiah awk ṭha lo tiang a rawk dih cang. Pakhat cu a sam a sau ruangah an mah an si kha kan fehter khawh hna . SAC nih an tlaih i a luat ṭhanmi 2 cu kahdohnak a chuah zing ah tlangcung in meithal thawng voihnih a thang. Ramlak ah an kalpi hna i khor an cawhter hna hnu ah an kahmi hna a si men lai” tiah Zalen ah a chim.
CNDF hriamtlai 2 an ruak cu Rihkhawdar khua No.2 sang thlaanhmun pawngah hmuh a si. Thah a tongmi pakhat hi kum 24 a si i fa a pawi liomi a nupi a kaltak. A dang pakhat hi kum 30 hrawng a si, nu le pa a ngeih ti lo caah a chungkhat sin ah a ummi a si tiah theih a si.
Ref: Zalen
About The Author
