SAC Ralkap Nih Thla 1 Chung Ah Mipi Inn 2,600 Leng An Khangh
The Chinland Post | 2023 July 3 — A luancia June thla chung ah SAC ralkap pawl nih Myanmar ramchung ah mipi inn voi 90 leng an khangh i ramṭhen le peng 6 ah mipi inn 2,600 leng an khangh tiah NUG nih cathanh a chuah.
NUG kuttang meithat zung nih cazin an khawmhsuat ning ah, Sagaing ramṭhen ah SAC ralkap nih voi 79 an khangh i mipi inn 2,511 a ciam. Sualnak ngei lo minung 9 a nung in an khangh hna i sianginn 1 le biaknak lei inn 4 a ciam ve tiah an langhter.
Cun Magway ramṭhen ah SAC ralkap nih voi 3 an khangh i sianginn 1 telh in mipi inn 77 a ciam tiah theih a si.
Mandalay ramṭhen ah SAC ralkap pawl nih voi 2 an khangh i mipi inn 10 a ciam, minung 6 a nung in an khangh hna tiah an ṭial.
Cun Kachin ram ah SAC ralkap nih voi 2 an khangh i a rawk mi inn 10 a um, Shan ram zong ah SAC ralkap nih voi 2 an khangh ve i mipi inn 40 a rawk tiah an thanh.
Taninthary ramṭhen ah SAC ralkap nih voi 5 an khangh i sianginn 1 telh in mipi inn 14 a rawk tiah an langhter.
Atu langhter mi cazin pawl hi NUG nih thawngzamh pawl, zatlang phu pawl thanh mi le khuami hna nih kuat mi cazin pawl fonh in an langhter mi a si i a taktak dirhmun ah SAC ralkap nih an buar mi a tam chin lai tiah NUG nih a langhter.
About The Author
