SAC ralkap pawl bom an puah hnawhnak hmunhma ah kuan, bom le raltuknak thilri pawl Myaing PDF nih an lak khawh
The Chinland Post | 2022 August 18 – Myaing PDF nih SAC ralkap pawl nihnih chung bom an puah hnawh hna i 8 an thi. Cuka hmunhma ah kuan, bom le raltuknak thilri pawl kan lak khawh tiah Myaing PDF nih August 16 ah a thanh.
Myaing peng, Tengyi khuate le Tat khuate karlak ah August 15-16 tiang Myaing PDF nih SAC ralkap pawl bom an puah hnawh hna.
August 15 ah eidin a rak puttu ralkap mawṭaw 2 cu bomrap an puah hnawh hna i SAC ralkap 1 a thi 3 an i hliam, cun a bawkmi SAC ralkap pawl an lau tuk i thingkung tang an i thuh lioah bom an puah hnawh ṭhan hna i SAC ralkap 3 an thi, 1 aa hliam tiah an thanh.
August 16 zongah August 15 kahdohnak hmunhma ah hmunhma a lami SAC ralkap pawl cu bomrap an puah hnawh ṭhan hna i SAC ralkap 3 an thi, 2 an i hliam tiah a thanh.
Cuka hmunhma kahdohnak i a thimi SAC ralkap ruak char ding in a raami SAC ralkap pawl cu August 17 ah bom an puah hnawh ṭhan hna i SAC ralkap nih a pawngkam ummi dawr zuartu 2 an thah hna tiah Myaing PDF nih a thanh.
Cucaah mipi hna nih SAC ralkap an umnak he hlatpi ah um ding in Myaing PDF nih a thanh.
About The Author
