Sagaing Forum: Dohthlennak Tuahmi Bu 173 An Kai, Interim Sagaing Consultative Council Dirh Ding In Ceihhmainak An Ngei
Salai Mangpau | June 1, 2023 — Sagaing Ramthen ah May 30-31, 2023 ah a voikhatnak Sagaing Forum ah “Interim Sagaing Consultative Council” dirh ding in ceihhmainak an ngei kong cu Sagaing Forum nih a langhter.
Sagaing Forum ceihhmainak ah Sagaing ramthen chungah Federal Democracy phunglam le zulhnak ding ahcun:
A. Division (Taing) Cankarlak (Interim) ah tuah herhmi planning ser kho ding
B. Division (Taing) tiangah nuhrin covo in khuakhan lairel khawhnak lam ser ding
C. Division(Taing) chung Hruainak (Admistration) kong le Dohthlennak a tuahmi hriamtlai phu karlak rualrem tein khuakhan lairel ti ding
D. Ramthen chung a ummi mipi hriamtlai bu lungrual in funtom khawhnak lam ser kho ding hi Division (Taing) tiangah a biapi bik le a herhbik mi a si caah Ramkhel kong he pehtlai in hmailei kal hlan khawhnak lam ser ding tiah biaceihnak an ngei.
Forum nih a ceihmi ah hin, 1. Politics, 2. Raldohnak, 3. Mipi uknak (Administration) le 4. Adangdang kong tiah phun (4) hi a bik in an ceih tiah theih a si.
Sagaing Forum ah biaceih tinak in Sagaing ramthen chungah SAC an riantuannak le uknak duhlo ruangah dohthlennak a tuahmi hriamtlai bu vialte karlak ah lungrualnak in SAC dohti khawhnak ding le Interim Division (Taing) Consultative Council a silo le Bu liam pakhat dirh in SAC ralkap uknak zeitikhmanh ah a chuak kho ti lo ding (Ci-hmit) ding le Federal Democracy phunglam ning tein ram ser kho ding ti hi Forum nih aa timh mi a si tiah theih a si.
Cun, adangdang kong ceihmi ah Duhlonak langhter ning kong, CDM kong, Kokkek thil man sung zohkhenhnak kong, Ralzaam pawl an i dornak kong hna cu nihnih chung ceihhmainak an tuah.
Sagaing Forum ah Sagaing Ramthen chung ummi Peng (28) chungin dohthlennak a tuahmi bu (173) le a leng in biangaitu (Observer) minung 31 an kai kho tiah Dohthelnak a tuahmi bu pakhat sin ah thawng theih a si. Hi Sagaing Forum tuahnak ah NUCC, CNA, KNU, YDF, People’s Revolution Front, ABSDF le Hriamtlai phu dang zong nih theihngalhpi nak cakuat an tial.
Sagaing ramthen Raldohnak
Sagaing ram cu Myanmar ram South-west (Thlang lei nitlak) ah a ummi a si. Myanmar chung ah Shan State chang a ngan mi peng pi a si hlei ah Division pa 7 lak zong ah angan cem mi a si rih.593.527 sq. kilometer a kau i Myanmar ram um 14% dihlak huap mi peng a si.
Sagaing ram chung milu dihlak 5,325,345 an um. Pengkulh 10 a um. Mah hna cu Sagaing pengkulh, Shwebo pengkulh, Monywa pengkulh, Katha pengkulh, Kalay pengkulh, Tamu pengkulh, Mawlaik pengkulh, Hkati pengkulh, Yinmarbin pengkulh le Kanbalu pengkulh hna an si.
Township timi peng dihlak 37, Sub-town timi Myo dihlak fonh ah 46, khuapi chungmi sang (Ward) 229 le Village Tracts Ohsuh 1,761 le khua te dihlak 6,504 an um. (2014 census). Special mahte uk nak nawl a ngei mi Naga ah Town pathum um mi Lahe, Lashe le Nan Won hna an um.
Myanmar ram hmunlai bik a si mi le Kachin ram lei kalnak lam ah Sagaing ramthen ah Shwebo peng, WatLet peng, Khin Oo peng, Taze peng, le Dibeyin peng hna an um. Ayawaddy tiva pi a hnu lei kap Chindwin tiva i hmailei kap a ummi le raldohnak ah hmun rem ngai a si mi Shwebo pengkulh chungtel khuate ah SAC ralhrang rual nih ni fatein mipi harnak/hnahnawhnak an pek hna.
Shwebo pengkulh hi Myanmar lei a laifang le Kachin ramkulh umnak lam a si caah SAC ralhrang nih Myanmar chaklei (Northern) ralhmun ralhruang (defense) lak khawhnak ding hmun rem ngai a si. KIA lei in an hun zuang tik ah mah Shwebo pengkulh nih a kham. Cucaah ralhrang uk mi pengkulh si peng ding hi ralhrang nih an buaipi ngai.
Sagaing ramthen in Chinram lei Kainak Lam
Chinram kalnak lampi a um mi Chindwe tiva hnu lei khua Yinmarpin pengkulh chung um Yinmarpin peng, Salinkyi peng, Pale peng, le Kani peng le Myaing peng le pengdangdang ah kapdohnak a um ruang ah khua mi tong tampi ralzaam in an um. Pengkulh chung in raldoh training a cawnmi PDF pasal tha tampi an um ve.
Chinram thlanglei Mindat peng kalnak lam awr ah Yinmarpin-Pale lam, Chin ram chaklei pengkulh hna le Kalaymyo pengkulh lam- Minkin peng, Kalaywa peng, le Kalaywa-Yakyi lam ah kahdohnak a um peng rih.
Cucaah Ralhrang nih Yinmarpin pengkulh chung lam hunhimnak an lak khawh ah cun Chin ram le Kalaymyo lei ral dohnak ah a tha lai ti an ruat ruang ah ralhrang nih fakpi in an nor peng nak a si. A bik in Pungtaung/Pungngia tlang hi mipi PDF le hmunhma lak nak ah a rem ngai mi a si caah SAC ralhrang lei nih an runven peng. Mah tlangthluang ah PDF lei nih ralhrang tamnawn te an thah cang hna.
Rakhiang ramthen, Chin ramkulh, Kachin ramkulh, tlangcung in rawn lei an run nam hna sehlaw Chindwin ummi PDF hna he fonh in Sagaing ramthen in Mandalay ram tiang fawi tuk in an lak kho lai.#
About The Author
