Sagaing le Kayah ah SAC ralkap pawl an kah hna i 28 an thi, mipi hriamtlai 3 le mipi 1 an nunnak a liam

The Chinland Post | 2022 October 18 – Sagaing ramṭhen le Kayah ram hna ah SAC ralkap pawl an kah hna i 28 an thi, mipi hriamtlai 3 le mipi 1 an nunnak a liam tiah PDF phu pawl nih an thanh.

October 17 chun sml 2:50pm hrawng ah Sagaing khua in a rak ṭummi SAC ralkap mawṭaw 10 cu Natyekan khua le Yeposa khua karlak ah PDF phufonh nih lung 6 aa phirmi bomrap in an puah hnawh hna i SAC ralkap 8 an thi, tampi an i hliam tiah theih a si.

October 17 chun sml 3:00pm hrawng zong ah Sagaing ramṭhen, Kawlin khua ah ke in aa chawkmi SAC ralkap pawl cu bomrap an puah hnawh hna i 2 an thi tiah theih a si.

Bomrap an puah hnawh hna hnu ah SAC ralkap pawl nih meithal an kah thlorh caah pa 1 kuan nih a khen i a thi, adang nu 1 zong kuan nih a khen, a pawngkam thilzuartu 20 nak tlawm lo zong SAC ralkap nih an tlaih hna tiah theih a si.

Kayah ram ah SAC ralkap le KNDF phufonh hna karlah kahdohnak voi 9 a chuak i SAC ralkap 18 an thi tiah KNDF B02 sin in thawng theih a si.

September 17 ah Padange khua ah a lutmi SAC ralkap pawl cu mipi hriamtlai phufonh nih an kah hna i SAC ralkap 3 an thi, 5 an i hliam, mipi hriamtlai lei in 1 a nunnak a liam tiah theih a si.

September 26 ah mipi hriamtlai phufonh le SAC ralkap pawl hmunhma an khuarnak Kantaya lamṭhen ah kahdohnak a chuak ṭhan i SAC ralkap 2 an thi, 5 an i hliam tiah theih a si.

September 27 ah mipi hriamtlai phufonh nih Kantaya lamṭhen ah Sniper in an kah hna i 3 an thi, 3 an i hliam tiah theih a si.

October 8 ah Sniper in an kah ṭhan hna i SAC ralkap 1 a thi, October 14 zongah Nualawo ah hmunhma a khuarmi SAC ralkap pawl an kah ṭhan hna i KNDF B02 in hriamtlai 2 an nunnak a liam tiah theih a si.

Na ruahning rak langhter ve.. (Leave a comment)

%d bloggers like this: