Salen Khua Solar Mei Caah Tangka Thawhtermi Atu Tiang Mei An Hmu Rih Lo
Salai CungCung|2019 May 29| Thantlang peng Salen khua thal chung Solar mei bunhnak caah company pakhat nih January thla thawk in tangka an thawhter hna i May 29 tiang zei thawngpang hmanh an thei ti lo tiah kan theih.
“Hi Solar mei bunhpiak ding ah company pakhat nih khuabawi pa sin ah an chimh i khuabawi pa nih kan khua mi cu thawng thanhnak a tuah hnu ah Inn dong 60 hrawng nih Solar mei caah tangka cu khuabawi pa sin ah an pek. Solar mei hi a man phunphun in a um, Singkhat le cheu man hi 70 tibantuk in Solar man cu a cheu bantuk in a kan thawh ter i mei bunh dih hnu ah a taang mi cu pek than ding a si. Hi Solar mei cu zaan ah a ceu i chun ah a mah tein a mit mi phun khi a si. Hi bantuk in Solar mei kan duh cu Thal chung ah hin a si, tu cu fur zong a vun tla pah cang. Tu ni tiang zei thawngpang hmanh kan thei rih lo” tiah Salen khuami pakhat nih The Chinland Post ah a chim.
“Tu ni tiang Solar mei cu kan hmuh rih lo caah khuabawi sin kan va kal i fur zong a tlak cang lai, Solar zong ka hmuh rih lo caah kan tangka thawhmi kan khirh than u tiin kan va chimh hna tikah khuabawi pa nih tangka cu company sin ah ka ap dih cang a ti caah awlokchong in kan um ko. Hramthawk hrawng ah cun khuabawi pa sin kan kal tikah a rauh hlan ah an i pek ko hna lai a kan ti peng i tu ni tiang a kan pe rih lo” a chim chap.
“Company min hi ka thei lo, Celet zung lei in an tawlrel mi a si. Tu ni tiang a kan bunhpiak rih lo. Tangka cu a cheu bang ka thawh dih cang, a cheu kan thawh i a kan bunhpiak dih hnu ah a taang mi cu thawh than te ding khi a si. Asinain tu hi thla nga hrawng a rau cang, tu tiang a kan bunhpiak rih lo. An mah lei zong in zeihmanh pehtlaihnak a kan tuah lo. Celet zung ah voihnih tiang ka kal nain kanmah lei in zeihmanh a ruah awk kan thei lo, lungsau tein hngak ko u, an i tuahpiak te ko hna a kan ti. Solar caah tangka a thawhmi inn 70 hrawng kan si. Kan mah nih kan duh mi thaal chung ah hin a si nain tu cu June thla a vun si cang lai. Ka dang khuate zong an bunhpiak cang maw bunh rih lo ka thei rih lo, tu hi meeting ah va kai ka tim pah cang. Hi solar mei caah hin tangka thawh cu a zapi tein kan thawh khawh lo caah a cheu lawng nih kan thawh i inn dong 70 thawhmi chung in Sing 26 company sin ah kan ap cang” tiah Salen khuabawi Pu Mang Peng nih The Chinland Post ah a chim.
Tubantuk in Solar mei cu Thantlang peng Vambai zong ah an bunhpiak cang hna i tu hi Salen khua ah bunh piak rih ding in timh tuahnak an ngeih hi a si. Thantlang peng Salen khua hi Inn dong 170 hrawng an si tiah kan theih.
About The Author
