Kaladan Hlei Donh 68% Aa Lim; Thir Mei Kanghmi Hnon In A Thar An Hman Lai
Salai Elvis| 2019 June 3| Chin ramkulh, India-Myanmar pehtlaihnak a si mi Paletwa Kaladan hlei pi cu a tuni tiang ah zatuak 68% rian aa lim cang i mei nih a kangh mi thir pawl cu hman lo in a thar chuah chom in kan hman lai tiah Sipin vuanci U Soe Htet nih a chim.
Hlei donhnak thir pawl cu mei nih a kangh caah thir a ser tu Company le Japan fimthiam hna nih a hmun ah ra in zohfelnak an ngeih hnu ah tamtuk a kangh pin ah suimilam 8 chung mei nih a kangh caah hman khawh a si ti lo ti a si. Cucaah a tu thir pawl hi hman lo in a thar chuah chom in hman ding timhtuahnak ngeih a si” tiah Mynamaalinn he biaruahnak ah Sipin vuanci U Soe Htet nih a chim hi a si.
Hlei donhnak riantuanmi cu thla hnih tluk riantuan lo in an i din. Liamhrulhnak a um hnu lawngah rian pehzulh in tuan khawh ding a si lai caah riantuan an hnu deuh kho rih tiah theih a si.
“Mah hlei donh mi cu a ralaimi 2020 February 20 Chin Miphun Ni ah hunnak tuah khawh dingin timhlamh a si bantuk in tuanvo latu le riantuantu hna zong an i zuam cuahmah lio pi a si ko. Hi hlei cu khua le ram thanchonak ding caah donhmi a si bantuk in kamkhat lei ah buaibainak a um caah a si. Riantuan kan nuar in kan rauh ti lo nakding ah mizapi le tuanvo ngeitu hna i bawmh kan herh” tiah a chim.
Kaladan hlei donhnak ding caah thilri a phurtu tilawng cu a luancia March 16 ni ah AA hriamtlai phu nih an rak kah caah thir Ton 300 tluk mei nih a rak kangh tiah theih a si.
About The Author
