Saw peng ah SAC ralkap voi tampi an doh hna i SAC ralkap 25 an thi
The Chinland Post | 2023 February 20 — Magway ramṭhen, Saw peng, Kyaukhtu hramhbunh SAC battalion in a rak chuak mi SAC ralkap pawl cu voi tampi PDF phu pawl nih bomrap an puah hnawh hna, an kah hna caah SAC ralkap 25 an thi, tampi an i hliam tiah Kyaukhtu PDF sin in thawng theih a si.
February 16 zinglei sml 8:53am hrawng ah Kyaukhtu hrambunh SAC battalion in mawṭaw 2, PHAW mawṭaw 1 in a rak chuak mi SAC ralkap 108 hrawng cu Kyaukhtu peng, Miaye khua pawng ah Gangaw pengkomh Battalion 9 nih bomrap lung 45 in an puah hnawh hna i SAC ralkap 10 hrawng an thi, cubantuk in zaanlei sml 4:46pm ah Miaye le Laysaw khuate pawng an phak ah bomrap lung 3 in an puah hnawh ṭhan hna i SAC ralkap 1 a thi, 4 fak pi in an i hliam tiah theih a si.
February 18 chun sml 12:41pm hrawng ah SAC ralkap pawl cu Shweaungthar khuate ah Tilin pyusawhtee pawl he rian an i thleng hna i kyaukhtu lei ah mawṭaw 2 le PHAW mawṭaw 1 ti in an zapi te 170 hrawng in an rak kir lio, Miaye khuate pawng ah Gangaw pengkomh Battalion 9 nih bomrap lung 10 in an puah hnawh ṭhan hna i SAC ralkap 6 an thi, 4 fak pi in an i hliam tiah Kyaukhtu PDF nih a thanh.
A thi mi SAC ralkap pawl le hliam a tuar mi pawl mawṭaw in an phorh hna lio ah timhcia tein a rak hngak mi PDF pawl nih an doh ṭhan caah SAC ralkap 8 an thi.
Cuka hmun i a thi mi SAC ralkap pawl mawṭaw in an phorh ṭhan hna i Kyaukhtu lei an panh lio, Pansan khua pawng ah bomrap lung 5 in voikhat, Kyaukhtu khua luhnak Yaw hlei phak lai ah bomrap lung 5 in voikhat an puah hnawh ṭhan hna i a thi mi an tam tiah theih a si.
About The Author
