Shan-Karenni ramri ah eidin a phor mi SAC ralkap an kah hna i 14 an thi, ralbawi 1 telh in 5 an tlaih hna
The Chinland Post | 2023 February 20 — Shan ram thlanglei, Karenni ram le ramri ah eidin a phor mi SAC ralkap pawl KA phufonh nih an kah hna i 14 an thi, 5 a nung in an tlaih hna leng ah meithal zuun 10 le hriam zong an lak khawh tiah KA kahdohnak lei thawngthanhnak phu sin in thawng theih a si.
February 19 zinglei sml 10:30am – 11:00am tiang KA, Karenni Commando Force hruainak in KA Battalion 1, KA Battalion 5 le KNDF phufonh hna nih ramri BP 12 lei ah hriam le eidin a rak phor mi SAC Infantry 54 in thazang 30 hrawng cu an kah hna i Company Commander telh in adang ralkap 5 an tlaih hna i an hman mi MA hriam zuun 10 le kuan, adang kahdohnak thilri pawl zong an lak khawh tiah theih a si.
Kahdohnak hmunhma zohfelnak an ngeih tik ah SAC ralkap ruak 6 an hmuh tiah theih a si.
Cubantuk in February 18 ah Shan ram thlangle, SSS hmunhma tan in eidin a phor mi SAC ralkap pawl KA nih timhcia tein an bawh hna i an kah hna caah SAC ralkap 3 nak tlawm lo an thi i hliam a tuar mi cheukhat zong an um tiah theih a si.
About The Author
