Shanram Thlanglei Kahdohnak An Thawk Ve Cang, Hsi Hseng Khua Palek Sakhan PNLA Nih An Lak
The Chinland Post | January 25, 2024 — Shan ram thlanglei kahdohnak cu January 24 ah an thawk i zaanlei caan ah Hsi Hseng peng ah SAC nih vanlawng in bom a thlak ruang ah tualchung mipi cheukhat an thi, Hsi Hseng khua palek sakhan cu PNLA nih an lak tiah theih a si.
January 24 zaanlei ah His Hseng khuachung kahdohnak a um hnu ah SAC nih Hsi Hseng khuachung palek sakhan um palek pawl cheukhat cu SAC ralkap an rak lak hna, Khuachung le khualutnak lei ah kaphnih karlak ah kahdohnak a um, Hsi Hseng khua lutnak le khuachuaknak ah January 24, zaanlei 3:00pm ah kahdohnak fak ngai in a um caah tualchung mipi khuachung in an chuak kho lo.
Vanlawng bomthlak ruangah khuachung inn 3 mei a kangh. Mi 2 an thi, khuadang hmundang a tli kho lo mi cu Phungki sianginn ah an um tiah theih a si.
Hsi Hseng khuachung um palek sakhan cu SAC ralkap le palek nih an chuah tak cang hnu ah PNLA le ṭangti phu hna nih sakhan an lak cang.
His Hseng peng chung ah SAC kuttang um PNO nih khatlei, PNLA le tangti bu hna nih phu khat fonh in kahdohnak a um hi a si i January 20 ni Ho Pung peng, Si Phu khua ah SAC ralkap le an kuttang um PNO bu le PNLA/PNLO kar ah kahnak a um hnu ah a tu Hsi Hseng khua tiang kahnak an tuah hi a si tiah Khit Thit media nih a chim.
Shan ramkulh hi nichuak, chaklei, thlanglei tiah hmun 3 in an then. Nichuak lei khualipi cu Taung Kyi, Chaklei khualipi ah Lashio, Nichuak khualipi umnak Keng Tung hna an si.
About The Author
