Sianginn Ap Lio Ah Thilri Zuarh Le Tangka Lami Paoh Ministry Zung Ah Dengteo In Report Rak Tuah Hna Uh
City Hunter| 2018 May 23| Sianginn ap lio ah tangka halnak, thilri zuarhnak tibantuk a um ahcun ministry zung ah dengteo in report nan rak tuah khawh hna tiah Fimcawnnak Ministry zung nih May 21 ah an thanh.
Tukum sianginn ap tikah zei bantuk man (fees) hmanh laak lo ding, tangka hal lo ding, laksawng thilri cohlan lo ding, sianginn uniform caah catang tazeih le sianginn tazeih pawl zuarh lo ding, a dangdang zei bantuk thilri hmanh zuarh lo ding in fimcawnnak ministry zung nih sianguk, saya/mah, riantuantu vialte nawl an pek hna.
Tangka an in hal hna le thilri an in zuarh hna ahcun fimcawnnak ministry zung, No.13, Naypyidaw asiloah dpsoffice@moe- mm.com ah report nan rak tuah khawh tiah sianginn apnak he pehtlai in nu le pa sin ah nawlnak le hngalhternak an tuah.
“Sianginn ap lio zarh chung ah siseh, fimcawnnak cacawn caan kumkhat chung ah siseh tangka kholh lo ding, laksawng thilri cohlanlo ding a biapi tuk” tiah Myanmar ramkomh Fimcawnnak Minister Dr. Myo Thein Kyi nih a chim.
Fimcawnnak ministry zung nih sianginn a kai kho dingmi zapi sianginn an i ap khawhnak ding ah a kum fatin May 25-31 tiang sianginn ap caan zarh siseh tiah ri an khiah.
Tukum fimcawnnak kum caah sianginn man (school fee), nu le pa le sayate member fee, letecelhnak (sport fee) man, catialnak le cauk tibantuk man le caruuk (library) man telh in zei bantuk man hmanh kholh le laak lo in siangniamrun caah sianginn uniform zunkhat, catialnak cauk ukruk le cawn dingmi textbook cauk phunkhat cio, sianghlairun le siangsangrun caah sianginn cawnding textbook cauk phunkhat cio alak in bawmhnak pek an si lai.
A cheukhat a minthangmi sianginn hna cu sianginn apnak tuah tikah tangka laak le laksawng thilri cohlan a um caah sianginn apnak le cohlannak cu sianguk pakhat lawng nih tawlrel lo in committee ser i rikhiahmi ningte in sianginn apnak le cohlannak tuah a si lai tiah fimcawnnak ministry zung nih nawl an pek chih hna.
2017-18 cacawn kum sianginn ap lio ah siangngakchia pawl catialnak cauk a zuarhtu Karen ramkulh in sianguk nu cu a rian an phuah. Cu pin ah textbook pawl siangngakchia a zuarhtu Karen ramkulh in siangsangrun cachimtu sayamah pathum cu sianglairun dirhmun in an rian (rank) an thumh hna.
Ref: 7Day News
About The Author
