Singapore Bank Nih Myanmar Airways International- MAI Tangka Bank Cazin An Phih/Khar Piak
Salai Mangpau | July 13, 2023 |
Myanmar Airways International- MAI bank tangka cazin an chiahnak cu Singapore ram hrambunh, UOB bank nih July thla dih ah phih/khar ding in bia khiahnak a tuah cang. MAI vanlawng nih a hmuh mi tangka miaknak hrampi hi SAC ralkap caah tangka kawlnak lam pakhat a si ruangah atu bantuk in tangka bank cazin an kharpiak mi a si tiah theih a si.
US ram le UK ram hna nih SAC ralkap pawl a zizutnak an rak tuah mi kha zohchunh khawh a si ruang ah a tu bantuk in UOB bank lei nih hrialawk tha lo in MAI tangka bank cazin cu phih/khar a si ve.
“UOB nih a mah lungtho tein a tuah mi a si lai lo. A tih mi ah Secondary Sanction Impact…tbk. An nih hi US Treasury Department nih Office of Foreign Assets Control-OFAC ti mi zung (office) a um. Amah nih chuakpiak mi Regulations pawl an um. An nih US ram Sanction a tuar mi bu a si sual ahcun an zung rianṭuantu vialte taza cuai (azizut) in dantat nak an tong kho. Mah bantuk Dantat (azizut) an ton ahcun US dollar million tampi a cawi lai caah ah a hmuh mi tangka miak he a si kho ti lo. Myanmar ram, Libya, Syria ram he pehtlainak bank cheukhat zong US million tampi dantatnak an rak tong bal” tiah Myanmar ram Labour Organization hruaitu U Maung Maung nih VOA ah a chim. 2014 kum Myanmar Sipuazi U Piang Limited nih a ngeih mi Myawaddy Trading Limited sin in Singapore ram company pakhat sin ah Thetseh a rak caw mi zong US dollar One Million dantat a tong bal.
“MAI tangka bank cazin a phihkhar ruang ah ramdang khualtlawng sin in Dollar tangka hmuhnak lam a pit tiah ti khawh a si. Ramdang mi khualtlawng pawl nih vanlawng Ticket an cawk tik ah US dollar in MAI ah an hman. Atu Singapore UOB bank nih phihkharnak a tuahmi cu anmah bank caah US dollar cawi le dantat a tih caah a si ko” tiah Myanmar ram ralkhel lei zohtu U Ye Htut nih a chim chap.
MAI Director Sara Vanan lei nih MAI tangka cazin cauk cu UOB bank ah pehtlai in hmang kho ding in cakuat pakhat a tial nain UOB bank lei nih cun MAI bank khar piak ding in bia khiah nak a tuah cang. UOB nih atu bantuk in a tuah caah a dang Singapore ram um, DBS bank, Thai ram Kasikorn bank. Dubai ram Emirates NDB bank ah bank cazin a thar in tuah ding timh tuahnak a ngei than tiah theih a si.
Ni hin vawlei pumpi nih phihkhar a tong mi Russia ram telh lo in ramdang bank kip nih US dollar hmang in tangka chuak/lut hmang cio a si tik ah a dang bank zong nih bank cazin an tuah piak ngam lai tiah an zum cio lo.
Kuwait ram lei um bank a si nain US lei bank he share a um. Thai ram kal in Kasikorn bank nih Sanction hmuh a duh maw/ Secondary sanction ti mi a si. Khua zei paoh ah rule of law a um. SAC nih a tlaih mi ramchung bank MFTB/MICB bank rual cu US ram nih kan hnu June 21 in an bank account phih/khar a ton cang. UOB lei nih July 1 in MAI bank cazin chung um tangka lut/chuak cazin a tuah dih lai. July 31 ah tangka kuatnak/check lethmah pawl a khar dih lai i, August 15 ni in Bank rianṭuannak vialte a dihlak in phih/khar dih ding a si lai tiah thawngthanhnak a tuah.
About The Author
