SAC ralkap Ser Mi Hriamnam A Leng Ah An Zuar
Salai Mangpau | July 13, 2023 |
SAC ralkap ser mi hriamnam cu Mipi ralkap sin ah zuar hi a lar tiah min langhter duh lo Karen ram chung um mipi ralkap sin in theih a si tiah Karen ram ralkap lei thawngthanh bu Karen Information Center-KIC News sin in thawng theih a si.
“Hriamnam an zuar hi kumcaan a sau cang. Hriamnam ser sehzung um ralkap cu hnu um battalion hngaktu (hmainor mi ralkap a si lo mi) an si. BGF bu le Khuapau dohtlennak mipi ralkap, tlangcung hriamtlai bu sin ah SAC ralkap sermi meithal, kuan le zen pawl an sin ah an zuar tawn. An uktu cunglei bawi sin report an tuahnak ah raldohnak ah kan hman hna tiah cazin an langhter i an leng mipi ralkap sin ah an ser mi hriamnam thilril man deng ngai in an zuar. Mah bantuk hi Karen ram chung ah a um” tiah KIC news nih a langhter.
Mahbantuk hriamnam a leng zuarnak kong cu cunglei bawi nih an theih ko nain an ralkap pawl CDM an tuah lai i an kan chuahtak sual lai ti an phang tuk caah dantatnak a um lo tiah an langhter chih.
Karen ram chung kahdohnak he pehtlai in KNLA bu le ṭangrual mipi ralkap phukomh bu hriamnam caah bawmhnak tangka in SAC ser hriamnam cu an cawk tawn. Atu cu mah kut tein ser chuah mi hriamnam a hmang kho mi dirhmun ah an phan cang tiah KNLA sin in thawngtheih a si.
Atu lio ah Phaann khua, HliangBuaih peng telh in a dang peng 5 hna ah KNLA ṭangrual mipi phu hna le SAC ralkap cu nitin in kahdohnak a um peng ruang ah SAC nih pengkip um kalnak lampi a phit/khar tawn tiah khua mi nih an chim.
KNLA le ṭangrual mipi ralkap nih ramri lei thilri luhchuahnak lam Phaann-Yangon lam ah um hmun a la mi le hlei kip ah a um mi SAC ralkap an kah tawn hna tiah KIC news nih a langhter.
About The Author
