Hakha Sipin Zung Nih Inn Sii Thuh Ding Le Muici Ngei Miti Nan Van Cio Dih Lai Tiah Nawl An Chuah
City Hunter| 2018 February 1| Hakha penguk sipin zung nih January 23 nithla khenh in a rawpcak cangmi inn pawl sii thuh (tin-baw sii thuh) ding in le Hakha Bogyoke lampi cung ah a ummi inn paoh nih muici ngei miti (ေရာင္စံုမီးသီး) nan bunh in nan thlai cio dih lai tiah nawl an chuah.
Hi kong he pehtlai in Dawrthar sang ah a ummi Rawl Dawr ngeitu pakhat nih, “Hiti sipin nih inn sii nan thuh hrimhrim lai, muici ngei miti nan bunh in nan thlai cio dih hrimhrim lai tiah nawl an chuahmi cu an luan tuk. Khuapi i dawh seh ti an duh ahcun anmah sipin nih muici ngei miti cu an thlai awk a si ko. Cun, inn sii nan thuh dih hrimhrim lai tiah nawl an chuahmi zong hi zaukphung ukhruainak he aa kalh. Hiti khawngtawn in ukhruai le nawlchuah hnawh an kan timh theu rih ahcun buainak nganpi a chuak te lai” tiah The Chinland Post ah a chim.
Pyidawtha sang ah a ummi innngeitu pakhat nih, “Kannih cu atu hi inn sii thuhnak kong ah kan buai tuk cang. Inn sii thuhnak ah tangka tampi a dih ding a si, cun muici ngei miti cawknak ding ah tampi dih ding a si rih fawn. Miti hi caw kho hmanh usihlaw kanmah te in bunh kan thiam lo caah mei ser thiammi auh le tangka pek an hau rih fawn lai. Cu ni hlan ah nan tuah hrimhrim lai ti in hiti nawl an kan chuah hnawh cu kan awlok a chong ko” tiah The Chinland Post ah a chim.
Hakha penguk sipin zung nih 2018 January 23 ah cakhenh number No. 220/A-25/HK-1(001) in nawl an chuahmi catlap ahcun atu bantuk in an langhter.
Avoi 70nak Chin Miphun Ni cu Hakha khuapi ah tuahding a si caah puai a si hlan ah Sipin ramri chung ah a ummi rawldawr pawl, khual riahbuk pawl, private bank pawl, Bogyoke lampi thluan cung i inn ngan pipi le rawpcak cangmi inn paoh a hnu bik 2018 February 9 hlan ah nanmahte cio in inn sii thuhnak in siseh, cun muici ngei (ေရာင္စံုမီးသီး) bunh le vannak cu pellote in nan rak tuah hrimhrim lai tiah nawl an chuah.
Hakha sipin zung nih muici ngei miti nan van dih lai an timi hi innchung ah van ding le hman ding khi a si lo. Lam in a langhnak ding innleng ah van ding khi an chim duhmi a si.
Hakha penguk sipin zung in lutlai Tam Aung Sein minthut in thawngthanhnak le nawlpeknak ca cu an chuah tiah kan theih. +++
Photo Credit: Hakha khuapi photo hi Aura thlakmi Google ah laakmi a si.
About The Author
