Hakha Innhmun Soktu 1079 Lakah 375 Cu Peklo Ding In Hnon An Si
City Hunter| 2018 February 1| Ekah 100 chung Hakha ah innhmun thar samh dingmi ah innhmun a soktu zapi 1079 an si. Hi chung ah minung 375 cu pek lo ding in min cazin hnon chung le 704 lawng pek ding in cohlan chung rih an si tiah kan theih.
Hi kong he pehtlai in innhmun peknak le chekhlatnak lei tawlreltu haotu a simi Hakha Khuanu Khuapa haotu Pu Siang Mang nih atu bantuk in The Chinland Post ah a chim.
“Tutan innhmun sok cazin kan langhtermi le kan taarmi hi phunli in kan chekfel. Cucu, nuhmei, pension laciami, pastor (biaknak upa) le innhlang ti an si. Tutan inn hmun a rak soktu zapi hi 1079 an si. Chekfelnak kan tuah hnu ah minung 375 cu hnon an si i 704 lawng thim le zapi theih in an min cazin tarchuah an si. Hi 1079 lakah hin Nuhmei a soktu zapi 245 an si. Hi chung ah 69 hnon an si i 176 lawng thim an si. Pension laciami hi a soktu zapi 161 an si. Hnonmi 76 le thimmi 85 an si. Innhlang in a soktu zapi hi 542 an si. Hnonmi 190 le thimmi 352 an si. Pastor in a soktu zapi hi 120 an si. Hnonmi 38 an si i thimmi 82 an si. Innhmun rawk a soktu zapi hi 11 an si. Hnonmi 2 le thimmi 9 an si” tiah The Chinland Post ah a chim.
Innhmun soktu cazin hi chekfeltu committee upa lawng nih dengteo in an thim hna lo. Sangkip upa bochanmi le sang chung thil sining a hngaltu pawl nihkhan an chekhlatmi a si. Tahchunhnak ah Pyidawtha sang minung 10, Dawrthar ah 14, sang dang ah minung 5 cio tibantuk ni an chekfelmi a si. Atu cazin langhtermi chung ahhin cozah zung, biaknak lei zung, zatlang mibu le media zung tibantuk aa tel lo. Annih pawl ca ahhin a dangte in innhmun 75 hrawng chiahpiak (reserved) an si tiah kan theih.
“Atu min cazin taarmi cung ah lungtlin lonak um cun a fekmi tette he zung ah bia rak chuahpi than khawh a si. Atu min cazin taar ciami zong hi adikfel lomi aum ahcun hnon than khawh an si. Avoi hnihnak chekfelnak tuah than dih hnu ah mee zuhter an si te lai. Innhmun hi a zapi 200 hrawng lawng a si te lai. February thla chung ahcun mee zuhter khawh an si te lai ti ka zumh” tiah Pu Siang Mang nih a biapeh ah a chimchih.
Innhmun hi misifak inn ngeilo ca bak ah papek in tuahmi a si caah innhmun a cotu mi sifak nih an pek khawh tawk ding a simi a tlangpi in ks. 50,000 in ks. 100,000 kar hrawng lawng a si te lai kan theih. Zeizat in dah tlanh a si lai timi biachahnak an tuah rih lo. Cun, innhmun pek tikah zeibantuk biahrennak le biakamnak dah tuahchih a si te lai timi zong penguk zung nih felfaite in phungphai an sercop than te lai tiah kan theih.
Hakha khuapi chung sangkip innhmun a soktu hna a dikthlir cazin cu a tanglei bantuk in an si.
Dawrthar Sang
Nuhmei; Minung 102 nih an sok i 26 hnon le 76 lawng thim an si.
Pension lacia: Minung 99 nih an sok i 46 hnon le 53 lawng thim an si.
Innhlang: Minung 298 nih an sok i 82 hnon le 216 lawng thim an si.
Pastor: Minung 72 nih an sok i 25 hnon le 47 lawng thim an si.
Dawrthar sang zapi a soktu hi 571 an si i 179 hnon le 392 lawng thim an si.
Pyidawtha Sang
Nuhmei: Minung 84 nih an sok i 36 hnon le 48 lawng thim an si.
Pension lacia: Minung 28 nih an sok i 11 hnon le 17 lawng thim an si.
Innhlang: Minung 124 nih an sok i 65 hnon le 59 lawng thim an si.
Pastor: Minung 21 nih an sok i 1 hnon le 20 thim an si.
Pyidawtha sang in a soktu zapi hi 257 an si i 113 hnon le 144 lawng thim an si.
Hakha Khuathar Sang
Nuhmei: Minung 19 nih an sok i 2 hnon le 17 thim an si.
Pension lacia: Minung 12 nih an sok i 5 hnon le 7 lawng thim an si.
Innhlang: Minung 48 nih an sok i 11 hnon le 37 lawng thim an si.
Pastor: Minung 9 nih an sok i 4 hnon le 5 lawng thim an si.
Hakha Khuathar sang in a soktu zapi hi 88 an si i 22 hnon le 66 lawng thim an si.
Dawrhlun Sang
Nuhmei: Minung 34 nih an sok i 5 hnon le 29 lawng thim an si.
Pension lacia: Minung 19 nih an sok i 14 hnon le 5 lawng thim an si.
Innhlang: Minung 53 nih an sok i 29 hnon le 24 lawng thim an si.
Pastor: Minung 13 nih an sok i 8 hnon le 5 lawng ohlan an si.
Dawrhlun sang in a soktu zapi hi 119 an si i 56 hnon le 63 lawng thim an si.
Cawbuk Sang
Nuhmei: Minung 6 nih an sok i an zapite in thim an si.
Pension lacia: Minung 3 nih an sok i an zapite in thim an si.
Innhlang: Minung 19 nih an sok i 3 hnon le 16 thim an si.
Pastor: Minung 5 nih an sok i an zapite in thim an si.
Cawbuk sang in a zoktu zapi 33 an si i 3 hnon le 30 thim an si.
Hakha Khuahlun Sang
Annih hi nuhmei, innhlang, pastor le pension lacia timi a um lo. Inn rawkmi an si. A soktu zapi hi 11 an si i 2 hnon le 9 lawng cohlan an si.
Innhmun a sok ko nain hnonmi pawl hi nuhmei, pastor, pension lacia le innhlang taktak an si lo ruang le inn a ngeih ko bu in a sok chih ruang ah an hnonmi hna a si. Hi hnonmi paoh nihhin a diklo an ti si ahcun sipin zung ah tette catlap le thil sining he zarhkhat chung ah thawngthanhnak tuah than rih khawh a si tiah kan theih.
Biakilh: Hakha khuapi photo hi Aura nih an thlakmi google ah kan laak chinmi an si.
About The Author
