Sittang Tiva Gate Sniper In An Kah i 1 A Thi, Kyauktaga Peng Kahdohnak Ah SAC Ralkap 4 An Thi
The Chinland Post | 2023 August 7 — Bago ramṭhen, Phyo peng ah a um mi Sittaung hlei SAC ralkap gate cu Sniper in an kah hna i pakhat a thi tiah NUG Ministry of Defense nih a thanh.
August 5 chun sml 2:45pm hrawng ah Phyu peng, Ohphyat khuate ah a um mi Sittang hlei a hngak mi SAC ralkap pawl cu KNLA le Yoma Column phu 2 fonh nih Sniper in an kah hna caah ralkap 1 a thi tiah theih a si.
Cun Bago ramṭhen, Kyauktaga peng, Tamin-inkone khuate chung ah a rak lut mi SAC ralkap le dothlennak phu pawl karlak ah kahdohnak a chuak i SAC ralkap 4 an thi tiah NUG MOD nih a thanh fawn.
August 3 zinglei sml 4:00am hrawng ah Kyauktaga peng, Tamin-inkone khuate chung ah a lut mi SAC ralkap pawl cu KNLA, PDF, Kyauktaga peng mipi vengtu phu nih an kah hna i 4 an thi, 3 an i hliam tiah theih a si.
Cu ni zaanlei sml 3:00pm hrawng ah Kyauktaga peng, Tuhtay tlang ah hmunhma a khuar mi SAC Infantry 264 nih Tamin-inkone khuate lei ah hriamngan voi tampi an kah i mipi inn cung ah a tla i a puah caah Kum 16 hngakchia Saw Paing Thu a thi tiah theih a si.
About The Author
