Sml 24 chungah Covid mizaw thar 7 kan hmuh chap tiah SAC nih a thanh
The Chinland Post | 2022 July 18 – Myanmar ram ah Covid-19 mizaw ṭhar 7 cu sml 24 chungah kan hmuh chap tiah SAC kuttang ngandamnak zung nih July 17 zaanlei ah a thanh.
A luancia sml 24 chungah Laboratory sample 4,507 check a si i zawtnak rungrul hmuhmi 0.16% a si tiah a langhter.
Cun, Covid-19 zawtnak in a thi chapmi an um lo caah Covid-19 ruangah a thi cangmi minung hi 19,434 an si tiah a langhter.
Myanmar ram pumpi ah Covid-19 zawtnak aa chawnhmi minung 613,816 an um i zawtnak in a dam cangmi 592,736 an si tiah a thanh.
Cun, a luancia ni tlawmpal ah Omicron zawtnak a ngeimi mizaw thar hmuh a si i Omicron zawtnak rungrul BA.4 le BA.5 zawtnak a ngeimi hi ramdang in Myanmar ram ah a rak kirmi Myanmar rammi an si i annih cu adang tein thlopbul an si. An ngan a dam ko tiah a thanh.
Asinain SAC ngandamnak zung thanhmi hi CDM siikhaan le sizung pawl ah hmuhmi telh a si lo i ralkap sizung lawng in hmuhmi a si caah a fiangmi cazin cu theih a si lo.
NUG nih cun Covid-19 zawtnak a thar hi a luancia zarh chungah vawlei pumpi level in a karh ṭhan tiah WHO thanhmi charhchan in ralrinnak a thanh.
Southeast Asian chung zongah Covid-19 zawtnak 20% a karh i a thimi 16% tiang a kai. Covid-19 mizaw thar hmuhmi hi zawtnak rungrul B.A.5 le B.A.4 a simi an tam tiah a thanh.
Cucaah mipi hna nih Covid-19 khamhnak si chunhding le zawtnak i kham khawhnak lam pawl zulh rih ding in NUG cozah nih forhfialnak a tuah.
Covid-19 khamhnak si aa chun cangmi hi a tutiang ah 29 million an si cang tiah SAC ngandamnak zung nih a thanh.
Asinain in mipi hna nih SAC cungah zumhnak an ngeih lo caah sii aa chunmi an tlawm tiah theih a si.
About The Author
