Social Media Cung Ah SAC Ralkap A Dohtu Chin Miphun Telh In Ramchung Minung 1,300 Leng An Tlaih Hna
The Chinland Post | 2023 October 9 — Social Media cung ah SAC ralkap a doh i dothlennak phu pawl cohlannak caṭial ruang le chim ruang ah Chin miphun telh in ramchung minung 1,300 leng an tlaih hna tiah Data for Myanmar nih October 8 ah cathanh a chuah.
Dothlennak phu pawl cohlannak kong Social Media cung ah caṭial le chimrelnak ruang ah SAC ralkap nih an tlaih mi mipi pawl hi thlakhat ah minung 65 hrawng in thla fatin an um i 2022 thla 4 chung ah minung 500 an tlaih hna tiah Data for Myanmar nih a thanh.
Tlaih a tong mi mipi pawl chung ah Yangon in 323, Mandalay in 284, Bago (ni chuahlei) in 104, Magway in 83, Irrawaddy in 78, Bago (ni tlaklei) in 69, Mon in 62, Taninthary in 59, Sagaing in 53, Naypyitaw in 42, Shan (thlanglei) in 40, Shan (chaklei) in 28, Kachin in 28, Karen in 25, Rakhine in 13, Shan (ni chuahlei) in 10 le Chin in 5 hna an si tiah Data for Myanmar nih a thanh.
An tlaih mi hna chung ah Facebook a hmang mi an tam khun i Tik Tok le Telegram a hmang mi cheukhat zong an i tel.
An tlaih mi hna hi thong an thlak hna/thlak hna lo, an luat cang/ luat rih lo tu cu a fiang in theih a si lo tiah an langhter.
SAC nih 2022 January 25 ah Social Media cung i forhfialnak, thawngpang thanhnak, tlerhkhawnnak hna a tuah mi cu miṭhalo pawl hnawhnak upadi pohma 52 (A), pohma 124 (A) le pohma 5050 (A), pohma 33 (A) hna in a zizut an si lai tiah a thanh.
An tlaih mi hna thawngpang pawl zong hi SAC ralkap lei thawngzamh pawl nih nifatin in an langhter ve.
About The Author
