Tanghra Phi Liomi Lai Siangngakchia Pakhat Nih Siaherhnak Taktak He Hringtu Nu Le Pa Vialte Sin A Biacah

City Hunter| 2018 March 11| March 7 thawk in Myanmar ram pumpi tanghra camipuai an thawk. Hakha No.1 siangsangrun ah tanghra camipuai a phi liomi Lai siangngakchia pakhat nih an fale tanghra a phi liomi hringtu nu le pa vialte sin ah siaherh taktak in biacahnak a ngeih hna. A biacahmi te hi atu lio tanghra camipuai a phi liomi chungkhar vialte nih tuahzulh cio ahcun thazaang petu taktak a si lai ti kan zumh caah The Chinland Post careltu zapi sin ah kan hun in hrawmh ve hna.

Tanghra phi liomi Lai siangngakchia pakhat nih hiti biacahnak a ngeihmi cu hringtu nu le pa le u le vialte sin ah a cahmi a si. Atu langhter bantuk in The Chinland Post ah a chim.

“March 7 ah Myanmar subject kan phi. Sianginn khan chung in ka chuak i ka hawile vialte cu an nu le an pa le an ule pawl nih an rak don dih hna. Kei cu dongtu ngei lo mithmai bi nawn te le thachia ngai in ka tin. Inn ka phanh in ziah na kan don ve lo ka ti hna i thaizing cu kan in don cang lai a kan ti. March 8 cu sianginn khan chung ka chuak i kutka hram in hringtu ka pa nih a rak ka don. Ka lungduh in ka phi kho set lo nain ka pa mithmai ka va hmuh. Na phi kho maw a ka ti, ka phi set lo tiah thachia nawnte khin ka leh. Ka pa nihcun atu nai kha sayapa pakhat nih nihin English question cu a har ngai a ti. Na thachia hlah, awnnak mark cu na hmuh ko lai tiah ka pa nih awnemte in a hun ka hnemh i thazaang ka la than. Lungtho te in zan cu ca ka zoh kho.”

 

“March 9 cu ka hawipa he camipuai kan phit dih in khaan chung in kan chuak veve. Kutka hram kan phak ah ka pa nih a ka don than. Ka hawipa kha hringtu a nu nih a don ve. Ka hawipa kha a phi kho lo tuk I a mithmai a panh lo tuk. Cu lio celngel cun a nu nih ziah na phi kho lo maw, mah tluk in na mithmai cu a chiat. Thate in ca zoh kan ti lengmang ko nain na duh lo ruang ah a si khah, na hrokhrol tuk hen cu tiah a nu nih a phit khawh lo chinchap ah a hun hro chap. March 9 zan cu ka hawipa cu cazoh zong a zuam ti lo, a lungdong ngai. Board ah kan umti i zan kan ih lai ah aruang ka hal i a ka lehmi cu ka phit lo chinchap ah ka nu nih mi tampi lakah a ka hromi kha ka celh lo tuk, ka ningzak tuk tiah a ka leh tiah a ti.

“Hringtu nu le pa sin le tanghra a phimi a kan dongtu kan ule vialte sin ah biacah ka duh hna. Tanghra a phimi nan fale, nan naule hi mi zeibantuk kan si ah siseh camipuai kan phit chungte hi cu rak kan si in rak kan hro hrimhrim hna hlah seh. Cun sik le hro a hmangmi le hmurka nem chawnhbiak a thiam lomi nihcun an fale kan dong ti hna hlah seh law a tha. Cun, an fale hi don lo le chawnbiak lo in kan um hrimhrim hna hlah seh. Thapek kan herh tuk. A taang rihmi camipuai chung cu hi biacah hi tanghra a phimi chungkhar vialte nih an fale, an naule an kan dawt taktak a si ahcun kan tuahzulhpiak hraam ko hna seh” tiah min langhter a duh lomi Lai sianngakchia pakhat nih The Chinland Post ah a chim.

Hngalhternak: Hmanthlak langhtermi le a cunglei thil a cangmi chungkhar hna he hin zeihmanh aa pehtlai lomi an si. Careltu nih anmah ah khin maw rak ruat sual hna hlah uh, anmah an si lo.

Na ruahning rak langhter ve.. (Leave a comment)

%d bloggers like this: