Tatmadaw Nih Laiza KIA Sakhan Hriamnam Ngan In An Kah
The Chinland Post| 2018 January 29| Kachin ralkap (KIA) le Cozah ralkap (Tatmadaw) kar ah tu hrawng cu fak taktak in an i kap i KIA zung pi umnak Laiza pawngkam zong January 27 ah khan hriamnam ngan in an kah tiah theih a si.
January 27 zanlei sml. 6: 30 hrawng ah khan Laizang pawngkam ah hriamnam ngan in tam ngai an kah tiah tualchung mi hna nih an chim. Cu kong cu KIO chimrelnak nawlngei Bohmugyi Naw Bo nih, “Hmun tam ngai in kah dawh kan si. Kan sakhan tam ngai an kan kah. A dihlak zun 20, 30 paoh cu a si lai dah. Tatyin 14 lei hoi cu an kan hliam ngai. Nizan cu vanlawng in an ra, nihnih nak cu an ke in an ra i kanmah zong kan i runven ve caah anmah lei zong an i khongdeng ngai ve ko lai dah. Cu ruang zong ahcun hi ka lei tu fak lak an kan kah nak hi a si kho men” tiah a chim.
Tu lio hi hmun hnih thum ah an i tu cuahmah tiah theih a si. An kaphnih ning tein an fak ngai ti asinain zeitluk in an i hliam timi bel cu a dikthliar in an thanh veve lo.
KIO le cozah ralkap hi 1994 ah kahdaih hnatlaknak minsen a rak thu cangmi an si nain kum 17 a rauh hnu 2011 June ah fak ngain in an i kap than i nihin tiang hi an i kahnak a dai kho ngai ngai lo.
Ref: RFA Burmese
About The Author
