Taze Ah Thazang 130 Hrawng SAC Ralkap An Kah Hna, 30 Nak Tlawm Lo An Thi
The Chinland Post | 2023 July 18 — Sagaing ramṭhen, Taze peng ah SAC ralkap le PDF phufonh hna karlak ah kahdohnak voi 2 a chuak i SAC ralkap 30 nak tlawm lo an thi, 9 an i hliam tiah Taze peng dothlennak phu nih thawng an thanh.
Taze khua, Kanhtoo palek sakhaan in a rak chuak mi thazang 130 leng LIB 361 SAC ralkap pawl cu July 17 zinglei sml 8:00am hrawng ah PDF phufonh nih hriamngan in an kah hna i SAC ralkap 4 an thi tiah theih a si.
Cun Chaung U khua lamṭhen a phan mi SAC ralkap le PDF phufonh hna cu July 17 zinglei sml 10:45am in chun sml 12:00pm tiang kahdohnak a fak i SAC ralkap 30 nak tlawm lo an thi, SAC ralkap pawl an sungh tuk caah Taze lei ah a rannak in an kir tiah Khit Thit nih a langhter.
Taze khua ah SAC ralkap pawl an rak luh lio ah SAC ralkap 20 nih an rak don hna, kahdohnak chung in hliam a tuar mi 9 cu pumpak in an hmuh hna. Khuachung in an rak chuah lio ah thazang 130 leng an si ko nain 30 leng an thih caah an thazang a zor ngai tiah an langhter.
Kahdohnak chung ah Taze PDF Shwebo pengkomh B06, B07, B09, B12, B25, Special Force, B26, KPK, TSR le PLA hna bawm in kahdohnak an tuah tiah theih a si.
About The Author
