Thai ram thlanglei ah phunglut lo Myanmar 40 leng an tlaih hna

The Chinland Post | 2022 November 21 – Thai ram thlanglei, Surat Thani pengkomh ah mawṭaw 2 in phungning lo in a rak phan mi Myanmar rammi 42 cu November 18 zinglei ah an tlaih hna tiah The Bangkok Post nih a langhter.

Surat Thani pengkomh Phunphin hmunhma, No.41 lampi ah Thai rammi minung 2 nih an mawng mi mawṭaw cu Thai palek nih an kham hna i an check hna hnu ah phungning lo in a rak lut mi Myanmar rammi 42 an tlaih hna hi a si.

Zinglei sml 3:00am hrawng ah mawṭaw a raang mi pakhat an dirter i a hnulei ah Myanmar rammi 18 an i tel tiah an ṭial.

Cun zinglei sml 4:30pm hrawng ah adang mawṭaw pakhat a rak phan ṭhan i check ding in an kham ko nain an khamnak pawl a pah i a zaam tiah an chim.

A zaam mi mawṭaw cu 7 kilometres tiang Thai palek nih an dawi hna i mawṭaw kehlei ke meithal in an kah hnu ah a tap.

Cu mawṭaw chung ah Thai miphun mawṭaw maungtu he Myanmar rammi pa 20, nu 4 tiah an zapi 24 an tlaih hna tiah a langhter.

Na ruahning rak langhter ve.. (Leave a comment)

%d bloggers like this: