June 20, 2024

Thai Ramri Um SAC A Hnu Bik Sakhaan KNLA le PDF Nih An Lak

0

The Chinland Post | 2024 May 27 — Karen ram le Thai ramri, Kawkareik khua um SAC Phu-chi-hmu sakhaan cu KNLA le PDF phufonh hna nih an lak cang tiah kahdohnak ah aa tel ve mi S.O.F nih May 26 ah a thanh.

Phu-chi-hmu sakhaan hi SAC MOC 13 kuttang LIB 557, IB 561 le hriamngan ralkap 399 hna nih hram an bunhnak sakhaan ngan pakhat a si i Karen le Thai ramri thluangthluan um SAC ralkap sakhaan a hnu bik tang mi zong a si.

Sakhaan lak kahdohnak chung ah Second Battalion Commander Yan Aung telh in SAC ralkap 48 a nung in an tlaih hna i ralkap 20 leng an thi tiah SOF nih an langhter.

Kahdohnak chung ah hriam zuun 50 leng an lak khawh i adang SAC ralkap 26 zong Thai ram lei ah an zaam tiah an ṭial.

KNLA le PDF phufonh hna cu Thai-Myanmar ramri um SAC ralkap sakhaan pawl a si mi Ta-ye-shioh sakhaan, Me-tha-raw sakhaan, Kwi-lone sakhaan le atu a hnu bik a tang mi Phu-chi-hmu sakhaan hna an lak khawh caah Karen ram le Thai ramri thluangthluan cu KNLA le PDF nih hmunhma an tlaih dih cang tiah S.O.F cathanh in thawng theih a si.

About The Author

Na ruahning rak langhter ve.. (Leave a comment)