Thantlang Chin Miphun Ni Tuahnak Ding Caah Khuachung Mi Bawmh An Hal Ti Hna Lai Lo

Salai Elvis| 2018 February 8| Avoi 70nak Thantlang Chin Miphun Ni tuahnak ding caah khuachung mi inn khat hnu inn khat tangka kholh tawn mi cu an kholh ti hna lai lo tiah tuanvo ngeitu pakhat sin in thawng kan theih.

Kumdang ah tuah tawnmi CND caah khuachung khuanu/pa hna sin ah bawmh rak hal tawn mi cu hal ti loin committee hna nih kadang ah bawmhhal in tuah an timh cang.

“Tutan CND tuahnak caah kum dangah khuachung ah bawmh rak hal tawnmi cu hal lo kan i tim cang. Hi puai ah tawlreltu Committee hna nih kadang ah bawmhhal mi in tuah a si cang lai. Asinain a tlamtlin lo sual ahcun thil sining tu kan zoh chom te lai. Tukum Chin miphun ni le tlangthluan pumpululh chuih zuamnak cu peh a si lai caah a pahnih ca in budget sing 140 kan i suai. Hi chungah hlasak thiam le ringawn lei zong sawm an si cang. Ringawn tum ding hlanmi hna zong chungkhar pakhat hna nih an kan liampiak. Committee hna nih a lenglei bawmhhalmi in le kumdangnak hlunghlai deuh in tuah kan timh” tiah CND Committee Pu Nawl Ceu nih TCP ah a chim.

Kumdang ah cun Committee nih a lengin tangka bawmhnak kawl pin ah a tam u cu khuachung mi hna nih tangka thawh in rak tuah tawn a si. Tukum Thantlang Chin Miphun ni ah ringawn lei in Fiakfairock Band, hlasak thiam Chin Idol Nu Esther le Thang Thang zong sawm an si cang. Khuangcawi zong an i tim nain minung a fiang rih lo. Tlangthluan pumpululh chuih zuamnak zong laksawng pakhatnak Cup, le tangka sing 5, pahnihnak sing 3 a si lai i thiamhlei laksawng zong a um chih lai tiah theih a si.

Tutan Thantlang Chin Miphun Ni cu tlangthluan pumpululh chuih zuamnak he peh ding a si lai caah February 19 zan le 20 ah nuamhnak a phunphun, tlangkip thilthuam hmuhsaknak, laam le hlasaknak zong a um chih lai tiah theih a si.+++

Leave a Commnet

%d bloggers like this: