Thantlang Khua Cu Kan Uk Khawh Dih Cang Tiah SAC Nih Thawng An Thlah
The Chinland Post | 2023 October 30 — Chin ramkulh, Thantlang khua cu Thi-din-kyot ni zaanlei thawk in kan uk khawh dih cang tiah SAC lei thawngzamh nih an thanh.
Ralkap nih a dotdot in dot 3 tiang ṭha tein kahdohnak an tuah i ni 90 a rauh hnu October 29 ah Thantlang khua ning in kan uk khawh dih cang tiah an langhter.
A luancia October 27 thawk in KIA, MNDAA, TNLA phufonh nih Lashio, Theindi, Kutkai, Muse, Kyokauk, Mone-koe, Phaung-sai, Kuan-lone, Chin-shwe-haw le Laukkai hna ah thazang tampi in kahdohnak a tuah caah nihin kahdohnak a fak peng tiah an langhter ve.
Himnak a la mi pawl (ralkap le palek), zung rianṭuantu pawl an i relh lo kar ah hriamtlai phu thazang tampi in kahdohnak kan tong, Thantlang khuami hna an tlaih i an thah hna, tangka an hal hna, mipi inn pawl an hrawh i an kangh tiah SAC lei nih lihhrawkhrawl thawng an thlah.
Cubantuk in SAC uknak a kal khawh lo nakhnga zung, lam hna an hrawh caah ralkap nih Counter-Terrorism Operation an thawk ve tiah an ṭial.
2023 February thawk in ralkap le palek pawl cu Thantlang khua ah an i relh lo kar ah kah an tong i khuacaan ruang le hmunhma ruang ah Thantlang khua thlanglei tiang hnu an kir, Thantlang khua zong mipi hriamtlai phu nih an tlaih i SAC ralkap le palek pawl cu Timit hlei tiang hnu an kir.
August thla thawk in a dot 1 nak ah Hakha in meng 4 aa hlatnak Timit hlei tiang ralkap pawl hmunhma an la i kahdohnak an tuah, a dot 2 nak ah Timit hlei in Thantlang khua luhnak tiang, a dot 3 nak ah Thantlang khua Construction Office (ဆောက်လုပ်ရေးရုံး) in CB Bank tiang, a dot 4 le a dongnak ah Thantlang khua sizung in High School tiang tiah a dotdot in kahdohnak kan tuah i kan lak khawh dih tiah an langhter fawn.
Atu cu ralkap le palek pawl nih Thantlang khua kulh in himnak an lak cang i a rawk mi Thantlang khua sersiam le dirh ṭhannak Program zong tawlrel lio a si tiah SAC lei nih thawng an thanh.
About The Author
