Thantlang Khua June Thlachung Ah Thingkung 1100 An Cin Cang
Salai Elvis| 2018 June 24| Thantlang khua June thla chung lawngah thingkung ci phun ruk in kung 1100 an ci cang tiah theih a si.
Hi thingkung cinnak cu June 17 ni ah Thantlang khuachung zungkip fonh minung 520 nih BEHS No.1 sianginn pawngah kung 1050 an cin i June 23 nih ah Thantlang Youth Association (TYA) mino minung 30 nih BEHS No.2 le sii-inn kam ah kung 50 an cin ve.
Tukum chung thingkung an cinmi lakah Ye-tin-win pin, sing-pan-pin le Cherry kung an cin mi a tam bik tiah theih a si.
“TYA nih kumpi kumkhat chung a riantuanmi ding aa hmaithlak mi chungah thingkung cin hi aa telmi a si caah tukum zong thingkung ci phun 4, kung 50 tluk kan cin than. Mah lawng si lo in kan hnukum ah kan rak cinmi a pawngkam zong thianhhlimhnak kan tuahpiak chih. Thantlang khua hi mizapi nih pal duh mi le tlonlennak ah a nuammi khua siseh timi hi mino nih kan i hmaithlak mi a si” tiah TYA President Khua Lian Hmung nih a chim.
Thantlang khuachung ah cozah lei le zatlang phu hna nih kumchiar thingkung an cin nain zeitluk dah a nung taktak mi a si timi theih khawh a si lo.+++
About The Author
